“Янги нишонлар ва янги қуроллар”: Эрон АҚШга жавоб зарбаси билан таҳдид қилди

Эрон Ислом инқилоби қўриқчилари корпуси (ИРГС) АҚШ янги ҳужум бошлаган тақдирда, аввал нишонга олинмаган объектларга янги қуроллар билан зарба берилишини маълум қилди.

ИРГС вакили Ҳусайн Моҳеббий Эроннинг жавоб чораларида уруш географияси, қўлланадиган қуроллар ва ҳарбий техника ўзгаришини билдирган. Унинг сўзларига кўра, Эрон жанг майдонига янги имкониятларга эга қуролларни олиб чиқишга тайёр.

Моҳеббий Эроннинг келгусидаги нишонлари аввалгилар билан чекланмаслигини, мамлакатда илгари ҳужум қилинмаган янги нишонлар мавжудлигини айтган. У янги қуролларнинг айримлари можаронинг аввалги босқичларида қўлланмаганини ҳам таъкидлаган.

Бу баёнот Эрон ҳарбий қўмондонлигининг АҚШ янги ҳужумга тайёрланаётгани ҳақидаги даъволари фонида янграган.

Эрон Қуролли Кучларининг Хатам ал-Анбия марказий штаб-квартираси АҚШ яқин келажакда Эронга қарши ҳарбий ҳаракатларни қайта бошлашга тайёрланаётгани ҳақида маълумот борлигини билдирган. Штаб янги ҳужум юз берган тақдирда, Яқин Шарқдаги АҚШ базалари ва манфаатлари Эроннинг жавоб зарбалари нишонига айланиши мумкинлигини маълум қилган.

Шунингдек, Эрон ҳарбий қўмондонлиги АҚШ ҳаракатларини қўллаб-қувватлайдиган ёки ўз ҳудуди ва объектларини бундай операциялар учун тақдим этадиган давлатларни ҳам огоҳлантирган.

Баёнотлар АҚШ ва Эрон ўртасидаги қарама-қаршилик давом этаётган бир пайтда янграган. Reuters хабарига кўра, 20 сентябрь куни томонлар ўртасидаги кескинлик сақланиб қолган, шу билан бирга дипломатик музокараларни қайта бошлаш эҳтимоли ҳам муҳокама қилинмоқда.