5 млрд доллар ажратилади: АҚШ Яқин Шарқ энергетикасини тиклашни таклиф қилди
Умумий қиймати 10 млрд долларга етиши мумкин бўлган фонд Ҳурмуз бўғозига нефт ва газ ташишда қарамликни камайтирувчи инфратузилмани ривожлантиришга ҳам йўналтирилади.
АҚШ маъмурияти Яқин Шарқда урушдан зарар кўрган энергетика инфратузилмасини тиклашга кўмаклашувчи янги фондга 5 млрд доллар ажратишни таклиф қилди. Бу ҳақда The Wall Street Journal АҚШ ва минтақа расмийлари ҳамда ҳужжатларга таяниб хабар берди.
Таклиф этилаётган фонднинг умумий ҳажмини 10 млрд долларга етказиш режалаштирилмоқда. Бунинг учун АҚШ саккизта минтақавий ҳамкоридан — Саудия Арабистони, БАА, Қатар, Баҳрайн, Қувайт, Уммон, Ироқ ва Иорданиядан — яна 5 млрд доллар миқдорида маблағ жалб қилишни кўзламоқда.
Фонд маблағлари Яқин Шарқдаги шикастланган нефт ва газ инфратузилмасини қайта тиклаш билан бирга, энергия экспортининг Ҳурмуз бўғозига қарамлигини камайтирадиган муқобил йўналишлар ва инфратузилмани ривожлантиришга йўналтирилиши мумкин.
WSJ маълумотларига кўра, фондни АҚШ Халқаро тараққиёт молия корпорацияси (DFC) бошқариши режалаштирилмоқда. Бироқ янги фонд бўйича музокаралар давом этмоқда ва унинг шартлари ўзгариши мумкин. Қайси давлатлар якунда келишувга қўшилиши ҳам ҳозирча аниқ эмас.
Нашр ушбу ташаббусни етти ой давом этган Эрон уруши ортидан минтақанинг энергетика инфратузилмасига етказилган зарар ва глобал энергия бозоридаги узилишларга жавоб сифатида баҳолаган. WSJ маълумотларига кўра, можаро давомида минтақадаги нефтни қайта ишлаш заводлари, қувурлар ва бошқа энергетика объектлари зарар кўрган.
Шунингдек, Форс кўрфази давлатлари нефт экспорти учун Ҳурмуз бўғозига муқобил йўналишларни яратиш устида иш олиб бормоқда. Бироқ экспертлар бундай инфратузилмани қисқа муддатда барпо этиш мураккаб бўлиши мумкинлигини таъкидламоқда.
Reuters АҚШнинг 5 млрд долларлик таклифи ҳақидаги WSJ хабарини ҳозирча мустақил равишда тасдиқлай олмаганини маълум қилди.
