ХДП Тошкентдаги жамоат транспорти тарифлари бўйича ўз позициясини билдирди
Тошкентда автобус ва метрода бир марталик электрон тўлов тарифини қарийб 47 фоизга ошириш таклифи муҳокама қилинаётган бир пайтда партия ўқувчилар учун имтиёзли тариф жорий этишни таклиф қилди.
Ўзбекистон Халқ демократик партияси Тошкент шаҳрида жамоат транспорти тарифларини қайта кўриб чиқиш ва мактаб ўқувчиларининг хавфсиз қатновини таъминлаш масалалари юзасидан ўз позициясини билдирди. Партия тарифларни белгилашда ташувчиларнинг харажатлари билан бир қаторда аҳоли даромадлари, оилавий харажатлар, ўқувчилар ва талабаларнинг кундалик қатнови, кам даромадли ҳамда кўп фарзандли оилаларнинг имкониятларини ҳам ҳисобга олиш зарурлигини таъкидлади.
Маълум қилинишича, Тошкентда автобус ва метрода бир марталик электрон тўлов тарифини қарийб 47 фоизга ошириш таклифи жамоатчилик муҳокамасига қўйилган. Шу билан бирга, мактаб ўқувчиларининг хавфсиз ва қулай қатновини таъминлаш мақсадида шаҳарда School Bus тизимини жорий этиш имкониятлари ўрганилмоқда. ХДП маълумотига кўра, ўтказилган сўровда қатнашганларнинг 73,5 фоизи ушбу таклифни қўллаб-қувватлаган.
Партия ўқувчилар учун алоҳида ва имтиёзли тариф механизмини жорий этишни мақсадга мувофиқ деб ҳисоблайди. Хусусан, барча ўқувчилар учун имтиёзли тариф, ижтимоий ҳимояга муҳтож ва кўп фарзандли оилалар фарзандлари учун эса қўшимча қўллаб-қувватлаш механизмларини яратиш таклиф қилинмоқда.
ХДП, шунингдек, School Bus тизими ота-оналар зиммасига қўшимча молиявий юк бўлмаслиги кераклигини билдирди. Партия хорижий тажрибада ўқувчилар транспорт харажатларини камайтириш учун чегирмалар, шунингдек, оила даромади ва мактабгача бўлган масофага қараб харажатларни тўлиқ ёки қисман қоплаш каби механизмлар қўлланилишини қайд этди.
Партия тарифлардаги ўзгаришларнинг ижтимоий таъсири очиқ ва холис баҳоланиши, қарорлар жамоатчиликка тушунарли асослар билан изоҳланиши ҳамда ўқувчилар учун самарали имтиёзлар ва оилаларни қўллаб-қувватлаш механизмлари яратилиши зарурлигини билдирди.
