Иш жойидаги тазйиқ ва зўравонлик: янги портал ишга туширилади
Ўзбекистонда иш жойларида хавфсиз ва ҳурматга асосланган муҳит яратишга қаратилган янги дастур амалга оширилади.
Ўзбекистонда меҳнат соҳасида хавфсиз ва ҳурматга асосланган иш муҳитини таъминлашга қаратилган янги дастур босқичма-босқич жорий этилади. Бу ҳақда Президентнинг “Меҳнат соҳасида хавфсиз ва ҳурматга асосланган иш муҳитини таъминлаш чора-тадбирлари тўғрисида”ги қарорида белгиланган.
Қарорга кўра, дастур давлат органлари ва ташкилотларида, устав капиталида давлат улуши 50 фоиз ва ундан ортиқ бўлган юридик шахсларда ҳамда уларнинг улуши 50 фоиз ва ундан ортиқ бўлган ташкилотларда жорий этилади. Шунингдек, дастур бошқа корхона, ташкилот ва муассасаларда ҳам босқичма-босқич татбиқ этилади.
2026 йил 1 декабргача “Хавфсиз ва ҳурматга асосланган иш муҳити” ахборот портали ишга туширилади.
Портал орқали иш жойидаги тазйиқ ва зўравонлик ҳолатлари бўйича мурожаатларни онлайн юбориш, уларни кўриб чиқиш, далилларни тўплаш, хулосалар тайёрлаш ва ахборот алмашиш имконияти яратилади.
Масъул ходимлар ёки раҳбарлар томонидан содир этилган тазйиқ ва зўравонлик ҳолатлари ҳақидаги мурожаатлар эса автоматик равишда тегишли ташкилотнинг юқори турувчи инстанциясига юборилади.
Шунингдек, мурожаатлар бўйича ўтказилган текширувлар, уларнинг натижалари ва кўрилган чоралар ҳақидаги маълумотлар порталда сақланади. Уларнинг ўчириб юборилишига йўл қўйилмайди.
Агар мурожаатда маъмурий ҳуқуқбузарлик ёки жиноят аломатлари мавжуд бўлса, у қонунчиликда белгиланган тартибда «112» ягона диспетчерлик хизмати орқали ваколатли органга юборилади.
Қарор билан Бошқарув самарадорлиги агентлигига портал орқали мониторинг ўтказиш ва аниқланган қоидабузарликларни бартараф этиш бўйича бажарилиши мажбурий бўлган тақдимномалар киритиш ваколати ҳам берилди.
Бундан ташқари, меҳнат жамоаларининг ички меҳнат тартиби қоидаларида қонунчиликда белгиланган тартибда аниқланган жинсий ёки жисмоний зўравонлик ҳамда шаҳвоний шилқимлик ҳолатларини меҳнат мажбуриятларини бир марта қўпол бузиш сифатида баҳолаш тавсия этилди.
Ходим томонидан ёки ходимга нисбатан содир этилган тазйиқ, руҳий босим, камситиш ҳамда мурожаат қилгани учун таъқиб қилиш ҳолатларини эса меҳнат интизомини бузиш сифатида баҳолаш тавсия қилинди.
