Пешона суягини емирган ўсимта: 21 ёшли аёлнинг юзи 3D имплант билан тикланди
Олти ой давомида бош оғриғи ва кўнгил айнишидан азият чеккан аёлда пешона суягини емириб борган ўсма аниқланди.
Фарғоналик 21 ёшли аёлнинг бир неча ой давом этган бош оғриғи ва пешонасида пайдо бўлган шиш ортида суякни емириб борган ўсимта аниқланди. Шифокорлар ўсимтани олиб ташлаб, зарарланган пешона суягининг ўрнини беморнинг анатомик тузилишига мос махсус 3D титан имплант билан тўлдиришди.
Энди келинлик уйига борган Фарғоналик келиннинг олти ой давомида боши оғриди. Кўнгли айниб, қусди. Кейин пешонасида каттагина шиш пайдо бўлди. Орадан икки ой ўтиб, шиш кўз соҳасига ҳам таъсир қила бошлади.
Вақт ўтиши билан оғриқлар кучайиб, бемор ҳатто кундалик ишларини бажаришда ҳам қийнала бошлади. Соғлигидаги муаммо тобора жиддийлашиб, чап кўзи хира кўра бошлади, бошидаги оғриқлар эса янада кучайди.
Шиш кўзига ҳам таъсир қилди
«Бошим қисиб оғрирди. Кўнглим айниб, қусардим. Олти ой давомида шу ҳолатда юрдим. Кейин пешонамда ёнғоқдек шиш чиқди. Икки ой ичида шишиб кетди. Чап томонимга кўпроқ таъсир қилди. Миям қисиб оғрирди. Шу кўзим хира кўрарди. Оғриқ кучайган сари кўзим ҳам хиралашиб, ҳолсизланиб борардим», — дейди 21 ёшли бемор.
Текширувлардан кейин шифокорлар пешона суягини емириб, ташқи томонга ўсиб чиққан ўсимтани аниқлашди.
Миллий тиббиёт марказининг нейрожарроҳи Ғайрат Эшқувватовнинг айтишича, бундай ҳолатларда ўсимта юз, бурун ва бош мия соҳаларига яқин жойлашган бўлиши мумкин.
«Бундай ўсимталар краниофациал ўсимталар дейилади. Кўп ҳолларда улар суякларни емириши билан кузатилади. Айнан шу беморимизда пешона суяги деярли емирилиб, пешона соҳасида катта шиш ҳосил бўлган», — дейди шифокор.
Операциядан кейинги энг катта муаммо
Ўсимтани олиб ташлашнинг ўзи етарли эмас эди. Чунки касаллик пешона суягининг катта қисмини зарарлаган. Бундай ҳолатда операциядан кейин юзда катта нуқсон қолиши мумкин. Шунинг учун шифокорлар беморнинг компьютер томографияси асосида махсус 3D имплант тайёрлашга қарор қилишган.
Аввало беморнинг зарарланган қисми компьютерда аниқ ўрганилган. Етишмаётган суяк қисми ўлчами ҳисоблаб чиқилган. Кейин эса айнан беморнинг анатомик тузилишига мос титан имплант тайёрланган.
«Биз 3D-инженерлар билан ҳамкорликда МСКТ тасвирлари асосида олиб ташланадиган ўсимтанинг ҳажмини ҳисоблаймиз. Шу жойга мос 3D титан имплант тайёрланади. Операция вақтида ўсимтани олиб ташлаб, ҳосил бўлган бўшлиққа махсус имплантни ўрнатамиз», — дейди шифокор.
«Ҳозир анча енгил бўлдим»
Операциядан кейин бемор ўзини анча яхши ҳис қилаётганини айтмоқда.
«Анча енгил бўлдим. Бошимнинг қисиб оғриши тўхтади. Пешонамни текислаб қўйишди. Секин-секин шишлар ҳам қайтмоқда», — дейди бемор.
Беморнинг 11 ойлик фарзанди бор. Унинг айтишича, касаллик белгилари фарзанди туғилганидан бир неча ой ўтиб бошланган. Бир неча ой аввал ёш онанинг ҳаёти оғриқ ва хавотир билан кечаётган эди. Бугун эса 21 ёшли аёл операциядан кейин фарзанди бағрига қайтиш, соғлом ҳаёт кечириш умидида.
Бу биринчи операция эмас
Миллий тиббиёт марказида шифокорлар бундай мураккаб операцияни биринчи марта амалга ошираётгани йўқ.
Яна бир ёш аёлда худди шунга ўхшаш ҳолат кузатилган. Аммо у беморда ўсимта пешона ва кўз соҳасининг янада катта қисмини зарарлаган.
«Биринчи операциямиз ҳам ёш аёлда бўлган. Унда ҳолат бундан ҳам мураккаб эди. Пешона ва кўз соҳасида олма катталигидаги ўсимта бор эди. Кўзи бир томонга силжиб қолганди. Биз ўсимтани тўлиқ олиб ташлаб, 3D имплант тайёрладик. Ҳозир юзи батамом симметрик. Ўзи ҳам хурсанд. Бу муаммодан халос бўлди», — дейди шифокор.
Бемор операциядан кейин мунтазам кўрикка келиб турибди. Ҳозир унинг юзининг симметрияси тикланган ва бемор ўзини яхши ҳис қилмоқда.
Замонавий технология — янги имконият
Мутахассислар 3D технологиялардан фойдаланиш амалиётини янада ривожлантириш ниятида. Индивидуал имплант тайёрлаш орқали зарарланган суяк қисмини беморнинг анатомик тузилишига мос тарзда тиклаш имкони пайдо бўлмоқда.
«Келгусида бу операцияларни янада йўлга қўйиб, ривожлантириш йўлидамиз. Беморларимизга янада сифатли тиббий ёрдам кўрсатишга ҳаракат қиламиз», — дейди нейрожарроҳ.
Замонавий тиббиётда 3D технологиялардан фойдаланиш эса бундай мураккаб ҳолатларда шифокорлар учун янги имкониятларни очмоқда.
Мўътабар Нурмуҳаммедова, журналист
