Tracker рулида 5-синф ўқувчиси: Фарғонада ота жавобгарликка тортилди
Вояга етмаган боланинг автомобиль бошқараётгани акс этган видео ижтимоий тармоқларда тарқалди.
Фарғона вилоятининг Сўх туманида 5-синф ўқувчиси отасига тегишли Tracker автомобилини бошқаргани аниқланди.
Ижтимоий тармоқларда вояга етмаган шахснинг транспорт воситасини бошқараётгани акс этган видео тарқалган. Ҳолат юзасидан ўрганиш олиб борилганда, автомобилни Сўх туманидаги 11-сонли умумтаълим мактабининг 5-синф ўқувчиси бошқаргани ва транспорт воситаси унинг отасига тегишли экани аниқланган.
Мазкур ҳолат юзасидан боланинг отасига нисбатан Маъмурий жавобгарлик тўғрисидаги кодекснинг 47-моддаси ҳамда 135-моддаси 2-қисми билан маъмурий баённома расмийлаштирилган.
Шунингдек, ота билан профилактик суҳбат ўтказилган.
Йўл ҳаракати хавфсизлиги бошқармаси ота-оналарни вояга етмаган фарзандларининг автомобиль бошқаришига йўл қўймасликка чақирди.
