200 минг долларгача: пул мукофотлари миқдори оширилди
Халқаро нуфузли шахмат мусобақаларида ғолиб ва совриндор бўлган ўзбекистонлик шахматчилар ҳамда уларнинг тренерлари учун бир марталик пул мукофотлари кўпайтирилди.
Ўзбекистонда халқаро нуфузли шахмат мусобақалари ғолиблари ва совриндорлари ҳамда уларнинг мураббийларига бериладиган бир марталик пул мукофотлари миқдори оширилди. Бу Президентнинг 2026 йил 21 сентябрдаги қарорида белгиланган.
“Халқаро нуфузли шахмат мусобақалари ғолиблари ва совриндорлари ҳамда уларнинг тренерларини муносиб рағбатлантириш чора-тадбирлари тўғрисида”ги қарор (ПҚ–346-сон) билан шахматчилар ва уларнинг мураббийлари учун янги мукофот миқдорлари тасдиқланди.
Янги тартибга кўра, катталар ўртасидаги Бутунжаҳон шахмат олимпиадаси ва паралимпиадасида ғолиб бўлган шахматчига 200 минг доллар, унинг мураббийига эса 50 минг доллар берилади.
Кумуш медаль соҳибига 100 минг доллар, мураббийига 25 минг доллар, бронза медаль соҳибига эса мос равишда 50 минг ва 12,5 минг доллар миқдорида мукофот берилади.
Ёшлар ўртасидаги Бутунжаҳон шахмат олимпиадаси ва паралимпиадаси ғолиблари учун шахматчига 20 минг доллар, мураббийига 5 минг доллар мукофот белгиланади. Кумуш медаль учун мос равишда 10 минг ва 2,5 минг доллар, бронза медаль учун эса 5 минг ва 1,25 минг доллар ажратилади.
ФИДE таснифига кўра, жаҳон миқёсидаги мусобақалар ғолиблари учун шахматчиларга 15 минг долларгача, мураббийларга эса 7 минг долларгача мукофот берилади.
Осиё миқёсидаги мусобақаларда ушбу миқдорлар шахматчилар учун 10 минг долларгача, мураббийлар учун эса 5 минг долларгача этиб белгиланган.
Шунингдек, халқаро гроссмейстер спорт унвонини олган шахматчига 5 минг доллар миқдорида бир марталик пул мукофоти берилади.
Қарор билан тасдиқланган янги мукофот миқдорлари АҚШ долларида белгиланган.
