Энди Ўзбекистонда чиқинди топшириб пул ишлаш мумкин

Бугун, 23 сентябрь куни Тошкент шаҳрининг Чилонзор туманида ҳамда Сурхондарё вилояти марказида чиқиндиларни топшириш эвазига пул тўлайдиган фандоматлар ишга тушди. Zamon.uz мухбири Тошкент шаҳрида ўрнатилган фандоматнинг тақдимот тадбирида иштирок этди.

Маълумотларга кўра, лойиҳа Норвегиянинг ТОМRА компанияси билан ҳамкорликда амалга оширилмоқда. Ичимлик идишларини автоматик йиғиш ва саралаш технологиялари соҳасида 50 йилдан ортиқ тажрибага эга мазкур компания ушбу йўналишдаги жаҳон етакчиларидан бири ҳисобланади.

Фандомат пластик ва шиша бутилкалар ҳамда алюминий ичимлик идишларини автоматик қабул қилиб, уларни кейинчалик қайта ишлаш учун алоҳида йиғиш ва саралашга хизмат қилади. Фойдаланувчи идишларни топширишда қуйидаги икки имкониятдан бирини танлайди.

Биринчи имконият – ҳар бир идиш учун 150 сўм олиш. Пластик бутилка, шиша бутилка ёки алюминий ичимлик идиши бўлишидан қатъи назар, қурилма томонидан қабул қилинган ҳар бир дона идиш учун бир хил – 150 сўм миқдорида пул рағбати берилади.

Иккинчи имконият – хайрияга ҳисса қўшиш. Фойдаланувчи пул рағбатини олиш ўрнига хайрия йўналишини танлаши мумкин. Ушбу йўналиш орқали йиғилган идишларни сотишдан тушадиган маблағлар хайрия мақсадларига ҳамда дарахт экиш ташаббусларига йўналтирилади.

Лойиҳанинг ижтимоий аҳамияти ҳам муҳим: у чиқиндиларни саралашни кундалик одатга айлантириш, ёш авлодда табиатга масъулиятли муносабатни шакллантириш ҳамда фуқароларнинг экологик маданиятини юксалтиришга қаратилган. Пул рағбати ва хайрия имкониятининг бир тизимда бирлаштирилиши эса экологик масъулиятни шахсий манфаат ва жамоат фойдаси билан уйғунлаштиради.

Пилот лойиҳа муваффақиятли натижа берган тақдирда, фандоматларни Тошкент шаҳри ҳамда республиканинг бошқа ҳудудларидаги аҳоли гавжум жойлар ва кўчаларга босқичма-босқич ўрнатиш режалаштирилган.