“Нега Нью-Жерсини бермайсиз?”: Сурия президенти Трампга Нью-Жерсини Исроилга беришни таклиф қилди

Сурия президенти Аҳмад аш-Шараа Дональд Трамп билан Оқ уйдаги учрашуви чоғида Голан тепаликлари масаласида Нью-Жерси штатини Исроилга беришни ҳазил тариқасида таклиф қилганини айтди.

Аш-Шараа бу воқеани 22 сентябрь куни Нью-Йоркда Атлантика Кенгаши томонидан ташкил этилган тадбирда сўзлаб берди. Унинг таъкидлашича, Трамп Голан тепаликлари Исроил суверенитети остида эканини айтганида, у АҚШ президенти билан ҳазиллашган.

“Голан тепаликлари сизникими эмас, аммо Нью-Жерси сизникими”, дея аш-Шараа Трампга мурожаат қилганини айтди. У Нью-Жерсида Трампни қўллаб-қувватламайдиган демократлар кўплигини ҳам ҳазил тариқасида қўшимча қилган.

Сурия раҳбари ҳазилдан сўнг Голан тепаликлари бўйича ўз позициясини ҳам аниқ баён қилган. Унинг таъкидлашича, мазкур ҳудуд Сурияга тегишли ва уни бошқа давлатга топшириш масаласида ҳеч бир давлат раҳбари якка тартибда қарор қабул қила олмайди.

“Голан тепаликлари ўз халқига тегишли. Шунинг учун на Сурия президенти, на Америка президенти, на бошқа ҳеч ким уларни топширишга ҳақли”, дея аш-Шараа ўз позициясини билдирган.

Голан тепаликларининг мақоми Сурия ва Исроил ўртасидаги асосий баҳсли масалалардан бири бўлиб қолмоқда. Исроил ҳудуднинг катта қисмини 1967 йилги Олти кунлик уруш вақтида эгаллаган. 1981 йилда эса Исроил бу ҳудудга ўз қонунларини бир томонлама татбиқ этган. БМТ Хавфсизлик Кенгаши 497-резолюция билан мазкур қарорни халқаро ҳуқуқ нуқтаи назаридан ҳақиқий эмас деб топган.

2019 йилда Дональд Трампнинг биринчи президентлик даврида АҚШ Исроилнинг Голан тепаликлари устидан суверенитетини тан олган. Ҳозирги Сурия раҳбари эса ҳудуд Сурияга тегишли эканини қайд этмоқда.

Аш-Шараа, шунингдек, Сурия ва Исроил ўртасида АҚШ воситачилигида тўғридан-тўғри музокаралар олиб борилаётганини маълум қилган. Унинг айтишича, томонлар айрим масалаларда келишувга яқинлашган, бироқ якуний келишувга ҳали эришилмаган.