Олтин ва кумуш тангалар: Самарканддаги Шахмат олимпиадаси учун эсдалик тангалари сотувга чиқарилади
Эсдалик тангалари 31,1 граммдан бўлиб, чекланган миқдорда зарб этилган.
Самарқандда ўтказилаётган 46-Бутунжаҳон шахмат олимпиадасига бағишланган эсдалик тангалари сотувга чиқарилади. Бу ҳақда Марказий банк хабар берди.
Маълум қилинишича, эсдалик тангалари 999,9 асиллик даражасидаги соф олтин ва кумушдан тайёрланган. Ҳар бир танганинг вазни 31,1 граммни ташкил этади.
Тангалар чекланган миқдорда — турига қараб 100 ва 500 донадан зарб этилган.
Уларни икки доналик махсус коллекцион тўплам шаклида ёки алоҳида харид қилиш мумкин.
Эсдалик тангаларининг сотув нархи ҳамда қайси банкларда мавжуд бўлиши ҳақидаги маълумотлар Марказий банкнинг расмий веб-сайти ва ижтимоий тармоқлардаги саҳифаларида эълон қилинади.
Шунингдек, Марказий банк расмий сайтида “46-Бутунжаҳон шахмат олимпиадаси — Самарқанд 2026” эсдалик тангаларига бағишланган алоҳида саҳифа ҳам очилган.
