Суд қарорисиз 48 соатдан ортиқ ушлаб туриш мумкин эмас: Конституциявий суд қарор чиқарди
Шахсни суд қарорисиз 48 соатдан ортиқ ушлаб туришга имкон берувчи норма Конституцияга мувофиқ эмас деб топилди.
Конституциявий суднинг 22 сентябрь куни бўлиб ўтган мажлисида шахсни маъмурий тартибда ушлаб туриш муддатига оид норма кўриб чиқилди. Мажлисда Олий Мажлис, Ҳукумат, Олий суд, Бош прокуратура, Омбудсман, Ички ишлар вазирлиги, Адлия вазирлиги ва бошқа ташкилотлар вакиллари иштирок этди.
Масала Олий Мажлиснинг Инсон ҳуқуқлари бўйича вакили — Омбудсманнинг мурожаати асосида кўриб чиқилган. Унда Маъмурий жавобгарлик тўғрисидаги кодекснинг 288-моддаси иккинчи қисмининг Конституцияга мувофиқлиги юзасидан масала қўйилган.
Амалдаги тартибга кўра, чегара тартибини ёки давлат чегараси орқали ўтиш пунктларидаги тартибни бузган шахслар айрим ҳолатларда уч суткагача, шахсни тасдиқловчи ҳужжат бўлмаган тақдирда эса прокурор санкцияси билан ўн суткагача ушлаб турилиши мумкин эди.
Бироқ Конституциянинг 27-моддасида шахс суд қарорисиз 48 соатдан ортиқ ушлаб турилиши мумкин эмаслиги белгиланган.
Конституциявий суд мазкур нормада 48 соатдан ортиқ ушлаб туриш зарурати туғилганда суд қарорини олиш механизми назарда тутилмаганига эътибор қаратди.
Шу асосда суд Маъмурий жавобгарлик тўғрисидаги кодекснинг тегишли нормасини Конституциянинг 27-моддаси учинчи қисмига мувофиқ эмас, деб топди.
Қарорда, шунингдек, шахсни 48 соатдан ортиқ ушлаб туриш масаласида прокурорни хабардор қилиш ёки прокурор санкцияси суд қарорининг ўрнини боса олмаслиги қайд этилди.
Мазкур қарор шахснинг эркинлиги ва шахсий дахлсизлигини таъминлаш, суд назоратини кучайтириш ҳамда маъмурий ушлаб туриш тартибини Конституция талабларига мувофиқлаштиришга қаратилган.
