“Биз терроризм қурбонларимиз”: Пезешкиан нутқи вақтида АҚШ делегацияси зални тарк этди
Эрон президенти АҚШ ва Исроилнинг Эронга қарши ҳаракатларини танқид қилиб, Теҳрон босим остида таслим бўлмаслигини билдирди.
Эрон президенти Масуд Пезешкианнинг БМТ Бош Ассамблеясидаги нутқи бошланиши билан АҚШ делегацияси мажлислар залидан чиқиб кетди. Бу ҳақда Reuters хабар берди.
23 сентябрь куни Нью-Йоркда БМТ Бош Ассамблеясининг 81-сессиясида нутқ сўзлаган Пезешкиан АҚШ президенти Дональд Трампнинг Эрон ҳақидаги баёнотларига жавоб қайтарди.
«Қўшма Штатлар президенти бизни террорчилар деб атади. Биз эса терроризм қурбонларимиз», — деди Эрон президенти.
Пезешкиан АҚШ ва Исроилнинг Эронга қарши ҳарбий ҳаракатларини танқид қилиб, можаро давомида тинч аҳоли, аёллар ва болалар ҳалок бўлганини таъкидлади. У нутқи давомида ҳужумлар оқибатида ҳалок бўлганлар акс этган суратларни ҳам намойиш этди.
Эрон президенти мамлакат АҚШ босимига таслим бўлмаслигини билдирди. Шу билан бирга, у дипломатик музокаралар учун эшик очиқ эканини, бироқ куч ишлатиш ёки таҳдид остида ўтказиладиган музокараларни қабул қилмаслигини таъкидлади.
Пезешкиан Эроннинг ядровий дастури ҳақида ҳам гапириб, мамлакат тинч ядровий энергетика, илм-фан ва технологияларни ривожлантириш ҳуқуқидан воз кечмаслигини айтди. У ядровий қуролга қарши эканини, бироқ ядровий билим олиш ҳуқуқидан маҳрум қилинишини қабул қилмаслигини билдирди.
АҚШ делегацияси эса Пезешкиан нутқи бошланиши биланоқ зални тарк этди. АҚШнинг БМТдаги миссияси ушбу ҳаракат юзасидан дарҳол изоҳ бермади.
Мазкур воқеа АҚШ ва Эрон ўртасидаги кескинлик сақланиб қолаётган бир пайтда юз берди. Бир кун аввал Дональд Трамп БМТ Бош Ассамблеясидаги нутқида Эрон билан келишувга эришиш ёки мамлакатга нисбатан кескин чоралар кўриш имкониятини тилга олган эди.
