Фарғонада солиқ қарзи сабаб ғишт заводи хатланди
Эндиликда мол-мулк электрон савдо майдончаси орқали сотувга чиқарилади.
Мажбурий ижро бюроси Бағдод туман бўлими иш юритувига солиқ қарздорлигини ундириш тўғрисидаги ижро ҳужжати келиб тушди. Унга асосан, белгиланган солиқларни ўз вақтида тўлашдан бўйин товлаб келган маҳаллий ғишт заводларидан бирига нисбатан мажбурий ижро ҳаракатлари олиб борилди.
Қонунчиликда ажратилган муддат ва берилган огоҳлантиришларга қарамай, корхона раҳбарияти қарздорликни сўндиришга шошилмади. Оқибатда, давлат ижрочилари томонидан завод ҳудудидаги барча мол-мулк, ишлаб чиқариш ускуналари ва тайёр маҳсулотлар тўлиқ хатловга олинди.
Эндиликда корхона эгасига қисқа муддат берилади. Агар қарздорлик тўлиқ ёпилмаса, хатланган ғишт заводи ва унинг мол-мулки E-Auksion электрон савдо майдончаси орқали сотувга чиқарилади.
