Германия қазилма ёқилғидан воз кечади: жараён 2045 йилгача якунланади
Режага кўра, мамлакат 2045 йилгача кўмир, нефть ва газдан фойдаланишни тўлиқ тўхтатишни мақсад қилган.
Германия ҳукумати 2045 йилгача қазилма ёқилғидан босқичма-босқич воз кечиш режасини эълон қилди. Тегишли ҳужжат 23 сентябрь куни тақдим этилган.
Режа Германиянинг атроф-муҳит масалалари бўйича вазири Карстен Шнайдер томонидан БМТ Бош ассамблеясида тақдим этилди. Германия шу каби режани қабул қилган Франция ва Нидерландиядан кейинги учинчи йирик давлат бўлди.
Ҳужжатга кўра, 2030 йилгача электр энергияси ишлаб чиқаришда қайта тикланувчи энергия манбалари улушини 55 фоиздан 80 фоизгача ошириш режалаштирилган. Шунингдек, шамол электр станциялари қувватини 12 ГВтга ошириш ва қуёш электр станцияларининг умумий қувватини 215 ГВтга етказиш кўзда тутилган.
Режада кўмир электр станцияларидан 2038 йилгача тўлиқ воз кечиш ҳам белгиланган. Бунда ушбу муддатни 2035 йилгача қисқартириш имконияти мавжуд. Ҳужжатда ўтиш даврида қазилма ёқилғидан фойдаланиш давом этиши қайд этилган.
The Guardian нашрининг ёзишича, экологик ташкилотлар мамлакатларнинг илгари мавҳум «углерод нейтраллиги»га эришиш бўйича ваъдалар бергани, ҳозир эса қазилма ёқилғидан тўлиқ воз кечишга қаратилган аниқроқ режаларни қабул қилаётганини ижобий ўзгариш сифатида баҳолаган.
Германия Ташқи ишлар вазирлигининг иқлим сиёсати бўйича собиқ махсус вакили, эко-фаол Женнифер Морганнинг таъкидлашича, бундай режа «фақат бошланғич нуқта» ҳисобланади. Унинг сўзларига кўра, белгиланган мақсадларга эришиш учун Германия транспорт ва иситиш тизимларини электрлаштириш борасида янада кўпроқ саъй-ҳаракат қилиши керак.
