Қирғизистонда президентлик сайлови: овоз бериш санаси маълум бўлди
Сайлов қонунчилигига кўра, овоз бериш январь ойининг тўртинчи чоршанбасида ўтказилади.
Қирғизистон Жогорку Кенеши навбатдаги президентлик сайловини 2027 йил 27 январда ўтказиш тўғрисида қарор қабул қилди. Қарор 24 сентябрь куни парламент мажлисида маъқулланди.
Амалдаги сайлов қонунчилигига кўра, навбатдаги президентлик сайлови президент ваколат муддати тугайдиган йилнинг январь ойидаги тўртинчи чоршанбасида ўтказилади. 2027 йилда ушбу сана 27 январга тўғри келади.
Сайловолди жараёнлари сайлов санаси расман белгиланганидан сўнг бошланади. Сайловолди ташвиқоти эса барча номзодларни рўйхатга олиш муддати якунлангач бошланиб, овоз беришдан 24 соат олдин тўхтатилади.
Қирғизистон қонунчилигига кўра, президентликка камида 35 ёшга тўлган, давлат тилини биладиган ва мамлакатда жами камида 15 йил яшаган фуқаро номзод бўлиши мумкин. Номзод хорижий давлат фуқаролигига эга бўлмаслиги керак
Шунингдек, 2026 йилда сайлов қонунчилигига киритилган ўзгартиришлар билан президентлик сайловларини ўтказиш тартибига қатор янгиликлар киритилди. Жумладан, сайлов куни чоршанбага тўғри келади ва дам олиш куни ҳисобланади. Номзодлар учун сайлов фондини олдиндан шакллантириш ҳамда сайловчилар имзосини қоғоз билан бир қаторда рақамли шаклда тўплаш имконияти жорий этилган.
