Покистон Афғонистонга зарба берди: Қандаҳорда портлашлар овози эшитилди
Покистон ушбу зарбалар Кобулдан амалга оширилган дрон ҳужумига жавоб бўлганини айтди.
Покистон Афғонистоннинг жанубидаги Қандаҳор шаҳрида дронларни учириш ва сақлаш учун фойдаланилган инфратузилмага зарба берганини маълум қилди.
Покистон ахборот вазири Атауллоҳ Тарорнинг айтишича, зарбалар аввалроқ Кобулдан амалга оширилган дрон ҳужумига жавобан уюштирилган. Унинг таъкидлашича, Покистон ҳаво мудофааси ушбу ҳужумни қайтарган.
Қандаҳорда бир нечта портлаш овозлари эшитилгани ҳақида Афғонистон ахборот ва маданият вазири ўринбосари Забиҳулла Мужоҳид TOLO News'га маълум қилган. Унинг сўзларига кўра, ҳужумлар оқибатида зарар етмаган.
Покистон расмийлари Кобулдан Афғонистон ҳудудида фаолият юритаётган қуролли гуруҳларга қарши чоралар кўришни талаб қилган.
Айни пайтда Афғонистон томони Покистонга дрон ҳужуми уюштирилгани ҳақидаги айбловларни рад этмоқда. TOLO News манбасига кўра, Афғонистон ҳаво кучлари ҳозиргача Покистонга дрон ҳужуми амалга оширмаганини билдирган.
Мазкур воқеа Покистон ва Афғонистон ўртасидаги кескинлик кучайган бир пайтга тўғри келмоқда. 21 сентябрь куни Покистон Пактика ва Кунар вилоятларидаги нишонларга ҳаво зарбалари берганини маълум қилган. Покистон расмийлари зарбалар натижасида 28 нафар жангари йўқ қилинганини билдирган бўлса, Афғонистон расмийлари ва БМТ уч нафар тинч аҳоли вакили ҳалок бўлганини қайд этган.
Афғонистон томони аввалги зарбаларга жавоб беришини билдирган.
