Трамп CNN ва Politico’га тақиқ қўйди, Мелания эса уларни тадбирига таклиф қилди
Трампнинг медиа тақиқига қарамай, Мелания Трамп CNN ва Politico журналистларининг Нью-Йоркдаги тадбирида иштирок этишига рухсат берди.
Дональд Трамп CNN, MS NOW ва Politico журналистларининг Оқ уйга киришини тақиқлаган бир пайтда, биринчи хоним Мелания Трамп идораси CNN ва Politico вакилларига Нью-Йоркдаги тадбирини ёритиш учун аккредитация берди. Бу ҳақда CNN хабар берди.
Аккредитация БМТ Бош Ассамблеяси доирасида Мелания Трампнинг “Fostering the Future Together” коалициясини кенгайтиришга бағишланган тадбир учун тасдиқланган. Ташаббус болалар фаровонлигини таълим ва технологиялар орқали қўллаб-қувватлашга қаратилган.
CNNнинг тадбирда иштирок этиши ҳақидаги аккредитация 21 сентябрь куни, яъни президентнинг ушбу нашрларни Оқ уйга киритмаслик ҳақидаги қарори кучга кирганидан бир кун ўтиб тасдиқланган.
18 сентябрь куни Дональд Трамп CNN, MS NOW ва Politico’ни Оқ уйга кириш ҳуқуқидан маҳрум қилган. Мазкур нашрлар эса қарорни АҚШ Конституциясининг Биринчи тузатишида белгиланган матбуот эркинлиги ҳуқуқларига зид деб ҳисоблаб, судга мурожаат қилган. Иш бўйича суд мажлиси 23 сентябрга белгиланган эди.
CNN маълумотига кўра, Мелания Трамп президентнинг тақиқидан хабардор бўлган. Унинг идораси эса ўз тадбирларига қайси ОАВ вакилларини аккредитациядан ўтказиш масаласида мустақил қарор қабул қилиш ваколатига эга бўлган.
Биринчи хоним тадбир давомида сунъий интеллект масаласига ҳам эҳтиёткор ёндашувни намойиш этган. У болалар манфаатларини технологияларни ривожлантириш марказига қўйиш ҳамда уларга сунъий интеллектдан хавфсиз ва масъулиятли фойдаланишни ўргатиш зарурлигини таъкидлаган.
CNN ушбу қарорни Мелания Трампнинг президентнинг медиа сиёсатидан алоҳида ёндашуви сифатида баҳолаган. Бироқ бу унинг Дональд Трампдан сиёсий жиҳатдан ажралгани ёки унга қарши чиққанини англатиши ҳақида расмий баёнот мавжуд эмас.
