600 млн сўмлик кредит эвазига 12 минг доллар: прокурор ёрдамчиси ушланди
Мансабдор шахс фуқаронинг автомобиль олди-сотдиси масаласини ҳал қилиш ва имтиёзли кредит олишига кўмаклашиш эвазига пул талаб қилган.
Тошкент вилояти Оққўрғон тумани прокурори ёрдамчисининг ноқонуний ҳаракатига чек қўйилди. Бу ҳақда Давлат хавфсизлик хизмати маълум қилди.
Қайд этилишича, ДХХ ходимлари томонидан Бош прокуратуранинг Шахсий хавфсизлик бошқармаси билан ҳамкорликда коррупцияга қарши курашиш йўналишида тезкор тадбир ўтказилган.
Унга кўра, прокурор ёрдамчиси хизмат мавқеидан фойдаланиб, фуқаронинг автомобиль олди-сотдиси билан боғлиқ масаласини ҳал қилиш ҳамда банкдан 600 млн сўм миқдорида имтиёзли кредит олишига кўмаклашиш эвазига жами 12 минг АҚШ доллари талаб қилган.
Тезкор тадбир давомида мансабдор шахс сўралган пулнинг 4700 долларини олаётган вақтида ашёвий далиллар билан ушланган.
Терговга қадар текширув жараёнида унинг бундан аввал ҳам мазкур фуқародан 1300 АҚШ доллари олгани аниқланган.
Ҳозирда ҳолат юзасидан унга нисбатан жиноят иши қўзғатиш чораси кўрилмоқда.
