Баландликдан йиқилиш ва қоқшол: Польшада вафот этган икки ўзбекистонликнинг жасадлари Ватанга қайтарилди
Уларни Ватанга қайтариш харажатлари Миграция жамғармаси томонидан қопланди.
Польшада август ва сентябр ойларида вафот этган икки нафар Ўзбекистон фуқаросининг жасадлари Ватанга қайтарилди. Бу ҳақда «Дунё» ахборот агентлиги хабар берди.
Маълум қилинишича, Ўзбекистоннинг Польшадаги элчихонаси марҳум фуқароларнинг жасадларини Ўзбекистонга олиб келиш билан боғлиқ зарур чораларни кўрган.
24 август куни Ольштин шаҳрида баландликдан йиқилиб, бошидан оғир жароҳат олиши оқибатида вафот этган Ж.Ҳ.нинг жасади 5 сентябр куни Ўзбекистонга олиб келинди.
5 сентябр куни Щецин шаҳрида вафот этган Т.Э.нинг жасади эса 20 сентябр куни Тошкентга етказилди. Расмий маълумотларга кўра, унинг ўлимига қоқшол сабаб бўлган.
Ҳар икки ҳолатда ҳам марҳумларнинг жасадларини Польшада Ўзбекистонга олиб келиш билан боғлиқ барча харажатлар Президент ташаббуси билан ташкил этилган Миграция жамғармаси ҳисобидан қопланган.
Элчихона мазкур жараённи Польша расмийлари билан ҳамкорликда барча босқичларда мувофиқлаштирган. Бу эса марҳумларнинг яқинларига оғир вазиятда қўшимча ташкилий ва молиявий юк тушишининг олдини олишга хизмат қилди.
