Эрон-АҚШ музокаралари: Теҳрон келишувга тайёрлигини маълум қилди

Эрон АҚШдаги 2026 йил ноябрь ойида бўлиб ўтадиган оралиқ сайловларни ҳисобга олмаяпти ва мамлакатнинг ҳар қандай қонуний ҳукумати билан келишувга эришишга тайёр. Бу ҳақда Эрон президенти Масуд Пезешкиан Fox News телеканалига берган интервьюсида маълум қилди.

Унинг сўзларига кўра, Теҳрон ўз қарорларини АҚШдаги сайловлар билан боғламаяпти.

«Агар ҳозирги Америка ҳукумати халқаро ҳуқуқ доирасида келишувга эришмоқчи бўлса, унда давом этинг. Агар бу сайловлардан олдин ёки кейин бўлса, бунинг биз учун қандай фарқи бор?» — деган Пезешкиан.

Президент Эрон АҚШ билан келишувга эришишга тайёрлигини ҳам таъкидлаган. Унинг қайд этишича, Теҳрон июнь ойида Вашингтон билан имзоланган келишув асосида музокараларни давом эттиришга тайёр.

«Биз сизнинг президентингиз билан келишувга эришдик, у имзоланди. Шунга асосланиб, олдинга силжишга тайёрмиз», — деган у.

Пезешкиан Эрон урушни бошламаганини ва можаро Теҳронга мажбуран юкланганини таъкидлаган. Шу билан бирга, у Эрон жанговар ҳаракатларни давом эттиришдан манфаатдор эмаслигини, бироқ ўзини қатъий ҳимоя қилишини билдирган.

«Биз урушни танламадик. Уруш бизга мажбуран юкланди. Биз уруш изламаймиз», — деган Эрон президенти.

У Эрон-АҚШ можароси йил охиригача якунланиши мумкинлиги ҳақидаги саволга аниқ жавоб бермаган. Пезешкианнинг таъкидлашича, урушни тугатиш бўйича қарорни АҚШнинг ўзи қабул қилиши керак.

Эрон президенти, шунингдек, давлатлар ўртасидаги муаммоларни мулоқот орқали ҳал қилиш мумкинлигини қайд этган.

Аввалроқ АҚШ президенти Доналд Трамп БМТ Бош Ассамблеясидаги нутқида Эрон билан келишувга эришиш ёки мамлакатни йўқ қилиш масаласи олдида турганини билдирган ва тинчлик келишувига умид қилаётганини айтган эди.