Эрон рейсларини тўхтатган давлатлар аэропортлари ҳам ишламаслиги мумкин — Моҳсен Ризоий

Эрон Олий Миллий Хавфсизлик кенгаши котиби Моҳсен Ризоий АҚШ санкциялари доирасида Эрон рейсларини тўхтатган қўшни давлатлар аэропортларига нисбатан чоралар кўрилиши мумкинлигидан огоҳлантирди.

 

Ризоий бу ҳақда 23 сентябрь куни Эрон давлат телевидениесига берган интервьюсида маълум қилган. Унинг баёнотига кўра, агар қўшни давлатлар АҚШ билан ҳамкорлик қилиб, Эрон рейсларини тўхтатса, Теҳрон бунга жавобсиз қолмайди.

 

“Агар қўшни давлатлар Эрон рейсларини тўхтатишда АҚШга қўшилса, уларнинг аэропортлари ҳам ишлай олмайди”, — деган Ризоий.

 

Бироқ у Эрон қандай аниқ чоралар кўриши ёки огоҳлантириш қайси давлатларга тааллуқли эканини очиқламаган.

 

Ризоий, шунингдек, АҚШ президенти Доналд Трамп Эроннинг ядровий иншоотлари ёки мамлакат тоғларидаги объектларга ҳужум қилиши мумкинлигини айтиб, Эрон Қуролли кучлари бунга жавоб беришга тайёрлигини билдирган.

 

Бу баёнотлар АҚШнинг Эрон авиация секторига нисбатан санкцияларини кучайтирганидан кейин янграган. АҚШ молия вазири Скотт Бессент 23 сентябрдан бошлаб Эрон авиакомпанияларига хизмат кўрсатадиган хорижий компаниялар ва аэропортлар иккиламчи санкциялар хавфига дуч келишини билдирган. Жумладан, Эрон самолётларига ёнилғи қуйиш, ер усти хизматларини кўрсатиш ёки уларнинг чипталарини сотиш доллар тизимидан узилиш хавфини туғдириши мумкинлиги айтилган.

 

Санкциялар кучга кириши ортидан Эрон авиакомпанияларининг айрим халқаро қатновлари бекор қилинган. Шу билан бирга, айрим йўналишларда парвозлар давом этган.