КДРда қайиқ ағдарилиб кетди: 41 киши ҳалок бўлди
Сўнгги йилларда мамлакатда сув транспорти билан боғлиқ ҳалокатларда юзлаб одамлар ҳалок бўлган.
Конго Демократик Республикасидаги Танганика кўлида қайиқ ағдарилиб кетиши оқибатида камида 41 киши ҳалок бўлди, 49 киши қутқарилди. Ҳодиса вақтида қайиқда тахминан 100 киши ва юк бўлган.
Al Jazeera хабарига кўра, ҳодиса пайшанба куни Конго ҳудудидаги Мапера қишлоғи яқинида юз берган. Танзаниянинг Кигома портидан КДРдаги Калеми шаҳрига йўл олган қайиқ кўлда чўкиб кетган.
Танганика вилояти транспорт вазири Норрис Мулонгойи бедарак йўқолган йўловчиларни қидириш ишлари давом этаётганини маълум қилди.
Ҳодисадан омон қолган Энни Моёни Radio Okapi'га айтишича, йўловчилар тунги соат 1:00 атрофида уйғониб кетганида қайиқнинг бир томонга қийшайганини кўрган.
Кеманинг ағдарилишига нима сабаб бўлгани ҳозирча номаълум. AP маълумотларига кўра, КДРда кемалар кўпинча ортиқча юкланади ва уларда қутқарув нимчалари бўлмайди. Сўнгги йилларда мамлакатда сув транспорти билан боғлиқ ҳалокатларда юзлаб одамлар ҳалок бўлган.
КДРда қайиқда ҳаракатланиш кўплаб аҳоли учун энг арзон транспорт воситаси ҳисобланади. Мамлакатда 100 миллиондан ортиқ аҳоли учун етарли инфратузилма мавжуд эмас.
Бу сўнгги бир ой ичида Кигома–Калеми йўналишида юз берган иккинчи йирик ҳалокатдир. 28 август куни MV Pacifique кемаси Кигома портида ёқилғи ортиш вақтида ёниб, портлаган. Radio Okapi хабарига кўра, олти нафар экипаж аъзоси ҳалок бўлган, яна бири бедарак йўқолган.
Шунингдек, июль ойида КДР марказида давлат имтиҳонларидан қайтаётган ўқувчиларни олиб кетаётган ёғоч қайиқ чўкиб кетиши оқибатида камида 20 киши ҳалок бўлган.
