Устоз қадрини эслатган “Дарс”: кинотеатрларда қўнғироқ чалинди, энди навбат томошабинларга!
Фильм марказида устоз ва тарбиянинг инсон ҳаётидаги ўрни туради.
“Дарс” фильми кинотеатрларда намойиш этила бошланди. Фильмнинг премьераси 24 сентябрь куни Ўзбекистон Миллий кино санъати саройида бўлиб ўтди.
Самимий ва ҳаётий воқеалар асосида суратга олинган фильмда устоз, китоб, тарбия, меҳр-оқибат ва оилавий қадриятларнинг инсон ҳаётидаги ўрни ёритилади.
Кинокартинада томошабинни жалб этиш учун сунъий можаро, фитна ёки қасос каби сюжетларга эмас, инсон ҳаётини ўзгартира оладиган оддий ва муҳим қадриятларга эътибор қаратилган.
Фильм воқеалари марказида Ойқиз образи туради. Унинг орзулари, хатолари ва ҳаётий синовлари орқали шошқалоқ ва хаёлпараст қизнинг мустақил фикрлайдиган, масъулиятли ва етук инсонга айланиш жараёни кўрсатилади.
Ҳанифа хола образи орқали эса баъзан инсон ҳаётида катта ўзгариш ясаш учун битта яхши устознинг ўзи етарли экани тасвирланади.
Фильмнинг 1 октябрь — Ўқитувчи ва мураббийлар куни арафасида катта экранларга чиқиши ҳам алоҳида аҳамият касб этади. “Дарс” ота-оналар ва фарзандлар биргаликда томоша қилиши, сўнгра устоз, китоб, тарбия ва ҳаётдаги мақсадлар ҳақида суҳбатлашиши мумкин бўлган оилавий фильм сифатида тақдим этилмоқда.
25 сентябрдан “Дарс” фильми мамлакат кинотеатрларида намойиш этилмоқда.
Фильм Контент маркази ва MA’NO CINEMA томонидан суратга олинган.
