Боғчадаги жинсий зўравонлик ҳолати: Болалар омбудсмани вазирликка тақдимнома киритди
Мактабгача ва мактаб таълими вазирлигидан боғчаларда болалар хавфсизлигини таъминлаш чораларини кучайтириш талаб қилинди.
Болалар омбудсмани мактабгача таълим ташкилотида тарбияланувчи болага нисбатан содир этилган жинсий зўравонлик ҳолати юзасидан Мактабгача ва мактаб таълими вазирлигига тақдимнома киритди.
Тегишли ҳужжат жорий йил 22 сентябрь куни Болалар омбудсманининг ваколатлари доирасида киритилган.
Тақдимномада мазкур ҳолат юзасидан ўтказилаётган хизмат текшируви натижаларини танқидий кўриб чиқиш, аниқланган камчиликларни бартараф этиш ҳамда масъул ходимларнинг белгиланган тартибда жавобгарлиги масаласини ҳал этиш сўралган.
Шунингдек, ҳодисанинг содир этилишига имкон берган сабаб ва шарт-шароитларни бартараф этиш, барча мактабгача таълим ташкилотларида болалар хавфсизлигини таъминлаш ҳамда келгусида бундай ҳолатларнинг олдини олиш бўйича зарур чораларни кўриш талаб этилган.
Жумладан, республикадаги барча мактабгача таълим ташкилотларида болалар хавфсизлигини таъминлаш чораларини кучайтириш, ходимларнинг касбий вазифаларини бажариши устидан манзилли текширувлар ташкил этиш ҳамда болалар хавфсизлигига қаратилган ички назорат механизмларини қайта кўриб чиқиш зарурлиги кўрсатилган.
Қонунчиликка мувофиқ, вазирлик тақдимнома ижроси юзасидан амалга оширилган ишлар ҳақида 15 кун муддат ичида Болалар омбудсманига тегишли ҳужжатлар нусхаларини илова қилган ҳолда маълумот тақдим этиши керак.
Болалар омбудсмани давлат органлари фаолиятида бола ҳуқуқларига риоя этилиши устидан парламент назоратини амалга оширишни давом эттиришини маълум қилди.
