“Трамп бўғози”: АҚШ президенти Ҳурмуз харитасини янги ном билан эълон қилди
У аввалроқ бўғозни шу ном билан аташни таклиф қилган эди.
АҚШ президенти Дональд Трамп Truth Social ижтимоий тармоғида Ҳурмуз бўғози «Трамп бўғози» деб белгиланган харитани эълон қилди.
Харитада Ҳурмуз бўғози доира ичига олинган ва унинг ёнида «Trump Strait» — «Трамп бўғози» деган ёзув акс эттирилган. Трамп харитага изоҳ қолдирмаган.
АҚШ президенти бундан аввал ҳам Ҳурмуз бўғозини ўз номи билан қайта аташни таклиф қилган. 2 сентябрь куни у бўғоз АҚШ назоратида эканини айтиб, уни «Трамп бўғози» деб аташ кераклигини билдирган. 9 сентябрь куни эса Трамп бу ғояни яна бир бор тилга олиб, АҚШ бўғозни назорат қилаётганини таъкидлаган.
Ҳурмуз бўғози Эрон ва Уммон оралиғида жойлашган стратегик денгиз йўли бўлиб, жаҳон энергетика савдосида муҳим аҳамиятга эга. АҚШ ва Эрон ўртасидаги можаро фонида бўғоздаги кемалар қатнови жиддий бузилган.
Аввалроқ Вашингтон ва Теҳрон Ҳурмуз бўғози орқали денгиз қатновини тиклаш бўйича меморандум имзолаган эди. Бироқ кейинчалик томонлар ўртасидаги келишмовчиликлар ва ҳарбий қарама-қаршиликлар сабаб келишувнинг амалга оширилиши ортга сурилган.
