Трамп Эроннинг 7 кунлик сулҳ таклифини рад этди — WSJ
АҚШ президенти Эронга зарбалар қайта бошланишини кутаётганини билдирган.
Дональд Трамп Эроннинг етти кунлик сулҳ ва Ҳурмуз бўғозини қайта очиш таклифини рад этган. Бу ҳақда The Wall Street Journal АҚШ расмийларига таяниб хабар берди.
Нашр манбаларига кўра, Трамп ёрдамчиларига ноябрь ойида бўлиб ўтадиган АҚШ Конгресси оралиқ сайловларидан кейин Эронга қарши бомбардимонлар қайта бошланишини кутаётганини билдирган. Бироқ келгусидаги зарбалар кўлами ҳозирча номаълум.
WSJ маълумотига кўра, Трамп Эрон етти кунлик келишув шартларига амал қилишига шубҳа билан қараган. Шу билан бирга, нашр манбалари президентнинг позицияси яқин ҳафталарда ўзгариши мумкинлигини истисно қилмаган.
Эрон томонидан илгари сурилган режага кўра, АҚШ Эрон портларига нисбатан денгиз блокадасини бекор қилиши, музлатилган Эрон активларини озод қилиши ва нефть экспортига қўйилган чекловларни юмшатиши керак. Бунинг эвазига Теҳрон Ҳурмуз бўғозини қайта очиш ва ядровий музокараларни бошлашга тайёрлигини билдирган.
Эрон ташқи ишлар вазири Аббос Ароқчининг маълум қилишича, етти кунлик режа доирасида аввал ҳарбий ҳаракатларни тўхтатиш ва Ҳурмуз бўғозини очиш, кейин эса ядровий масалалар бўйича музокараларни бошлаш кўзда тутилган.
Трамп эса БМТ Бош Ассамблеясидаги нутқида Эрон билан келишувга эришиш мумкинлигини билдирган, бироқ Теҳроннинг ядровий қуролга эга бўлишига йўл қўйилмаслигини таъкидлаган.
