Болаларга нисбатан жинсий зўравонлик учун умрбод озодликдан маҳрум этиш жазоси таклиф этилди — Шаҳноза Мирзиёева
Бу ҳақдаги қонунчиликка ўзгартиришлар масъул идоралар билан биргаликда ишлаб чиқилиб, кўриб чиқиш учун тақдим этилган.
Ижтимоий ҳимоя миллий агентлиги масъул идоралар билан биргаликда болаларга нисбатан жинсий зўравонлик учун жавобгарликни кучайтиришга қаратилган қонунчилик таклифларини ишлаб чиқди. Бу ҳақда агентлик директорининг биринчи ўринбосари Шаҳноза Мирзиёева маълум қилди.
«Болаларга нисбатан жинсий зўравонлик учун умрбод озодликдан маҳрум этиш жазоси!» дея ёзди Шаҳноза Мирзиёева.
Унинг сўзларига кўра, Ижтимоий ҳимоя миллий агентлиги масъул идоралар билан биргаликда бир неча ой давомида қонунчиликка ўзгартиришлар киритиш бўйича таклифлар устида иш олиб борди. Тайёрланган таклифлар кўриб чиқиш учун аллақачон тақдим этилган.
Шунингдек, ота-оналарнинг болаларга ғамхўрлик қилмагани учун, педагогларнинг эса зўравонлик ва камситиш ҳолатларига йўл қўйгани учун жавобгарлигини кучайтириш, жабрланган болаларга тергов ва суд жараёнининг ҳар бир босқичида ҳуқуқий ёрдам ва ҳимоя таъминланиши таклиф этилмоқда.
