Шавкат Мирзиёев Ўзбекистон шахматчиларини Жаҳон шахмат олимпиадасидаги ғалаба билан табриклади

Ўзбекистон Президенти Шавкат Мирзиёев 46-Жаҳон шахмат олимпиадасида тарихий ғалабага эришган мамлакат терма жамоаси аъзоларига табрик йўллади.

 

Президент ўз табригида Ўзбекистон терма жамоаси 200 дан зиёд мамлакат ва 2 мингга яқин гроссмейстер иштирок этган мусобақада иккинчи бор Олимпиада чемпиони бўлганини таъкидлади.

 

Терма жамоа амалдаги Олимпиада чемпиони Ҳиндистон, Хитой ва АҚШ жамоаларига қарши баҳсларда ғалаба қозонган.

 

Нодирбек Абдусатторов барча ўйинларда мағлубиятсиз қатнашиб, биринчи тахтада олтин медални қўлга киритган. Нодирбек Ёқуббоев эса Туркия, Ҳиндистон, Хитой ва АҚШ вакилларига қарши баҳсларда жамоа учун муҳим ғалабаларни таъминлаган.

 

Шунингдек, Президент Жавоҳир Синдоров, Муҳиддин Мадаминов ва Шамсиддин Воҳидовнинг терма жамоа ғалабасига қўшган ҳиссaсини алоҳида қайд этган.

 

Аёллар терма жамоаси ҳам 11 турда 7 та ғалабага эришиб, 13-ўринни эгаллаган. Парашахматчилар эса Самарқанддаги мусобақада тарихда илк бор бронза медалини қўлга киритган. Селби кумуш, Абдулазиз бронза медалига сазовор бўлган, Аҳадхон эса мусобақани мағлубиятсиз якунлаган.

 

Шавкат Мирзиёев Ўзбекистон шахмат федерацияси 2026 йилда ФИДЕ томонидан «Энг яхши федерация» деб топилгани, Рустам Қосимжонов ФИДЕ фахрий витсе-президенти, Ҳулкар Тоҳиржонова эса ФИДЕнинг Марказий Осиё давлатлари бўйича минтақавий президенти этиб сайланганини ҳам қайд этган.

 

Президент табригида ноябрь ойида жаҳон чемпионлиги учун тарихий беллашув бўлиб ўтиши ва унда Ўзбекистон шахмат вакили Жавоҳир Синдоров иштирок этишига ҳам тўхталган.

 

«Шу йил ноябрь ойида бизни яна бир катта шахмат байрами кутиб турибди. Жаҳон тожи учун бўладиган тарихий беллашувда шахматимиз фахри Жавоҳир Синдоровдан барчамиз улкан зафарларни кутиб қоламиз», — дейилади табрикда.

 

Шунингдек, давлат раҳбари шахматчилар, уларнинг ота-оналари, устоз ва мураббийлари, терма жамоа аъзолари ҳамда мусобақани ташкил этишда иштирок этганларга миннатдорлик билдирган.