Абу-Дабидаги махфий учрашув: Нетаняху БАА президенти билан учрашди
Учрашув мавзуси ва тафсилотлари расман маълум қилинмаган.
Исроил бош вазири Бенямин Нетаняху 27 сентябрь куни Бирлашган Араб Амирликларига махфий ташриф буюриб, Абу-Дабида мамлакат президенти Муҳаммад бин Зоид Ол Наҳаён билан учрашди. Бу ҳақда Reuters исроиллик юқори мартабали амалдорга таяниб хабар берди.
Маълумотларга кўра, Нетаняху эрталаб шахсий самолётда Абу-Дабига учган ва кун давомида БААда бўлган. У кечқурун Исроилга қайтган. Ташриф олдиндан эълон қилинмаган.
Учрашувнинг асосий мавзуси ҳозирча очиқланмаган. Нетаняху идораси ташриф тафсилотларига изоҳ бермаган, БАА томони ҳам дастлаб расмий муносабат билдирмаган.
Нетаняхунинг Абу-Дабига ташрифи Исроилда 2023 йил 7 октябрдаги Ҳамас ҳужуми олдидан БАА томонидан берилгани айтилаётган огоҳлантиришлар юзасидан баҳслар кучайган бир пайтга тўғри келган.
«Haaretz» нашри сентябрь ойида 2023 йилда БАА президенти Муҳаммад бин Зоид Нетаняху билан боғланиб, Ҳамас томонидан йирик ҳужум тайёрланаётгани ҳақида огоҳлантиргани ҳақида хабар берган. Мазкур хабар юзасидан Нетаняху ва БАА расмийлари илгари турли айбловларни рад этган.
Шу сабабли Абу-Дабидаги учрашувнинг айнан мазкур масала билан боғлиқлиги ҳозирча расман тасдиқланмаган. Учрашувда нималар муҳокама қилингани ҳақида ҳам томонлар маълумот бермаган.
