Боғчадаги фожиа: 3 ёшли бола кимёвий воситани ичиб, вафот этди
Бола шифохонага олиб борилган, бироқ унинг ҳаётини сақлаб қолишнинг имкони бўлмаган.
Тошкент вилояти Оҳангарон шаҳридаги 6-сонли давлат мактабгача таълим ташкилотида 3 ёшли боланинг вафот этгани юзасидан расмий муносабат билдирилди.
Маълум қилинишича, фожиали ҳодиса 2026 йил 28 август куни содир бўлган. 2023 йилда туғилган тарбияланувчи ташкилот ошхонасида ҳашаротларга қарши ишлатиладиган BSM воситасини ичиб қўйган. Бола зудлик билан Оҳангарон шаҳар тиббиёт бирлашмасига олиб борилган, бироқ шифокорлар унинг ҳаётини сақлаб қолишга муваффақ бўла олмаган.
Дастлабки маълумотларга кўра, боланинг бувиси мазкур ташкилот ошхонасида аутсорсинг ташкилоти ходими — ошпаз бўлиб ишлаган. Ҳодиса тарбияланувчининг бувиси ёнига, ошхонага кирган вақтда юз бергани айтилмоқда.
Ҳозирда ваколатли органлар томонидан боланинг ошхонага қандай киргани, кимёвий восита нима сабабдан унинг қўли етадиган жойда бўлгани ҳамда мазкур воситани сақлаш учун ким масъул бўлгани атрофлича ўрганилмоқда.
Ҳолат юзасидан тергов ва суриштирув ишлари давом этмоқда. Ҳодиса бўйича якуний хулоса ваколатли органлар томонидан ўтказилаётган текширувлар натижасига кўра берилади. Айбдорлиги аниқланган шахсларга нисбатан қонунчиликда белгиланган тартибда чора кўрилиши билдирилган.
