Ҳиндистон ва Непалда сув тошқинлари: 70 киши ҳалок бўлди

Ҳиндистон ва Непалда кучли ёғингарчилик оқибатида юзага келган сув тошқинлари ва кўчкилар сўнгги уч кун ичида камида 70 кишининг ҳаётига зомин бўлди. Непалда яна 11 киши бедарак йўқолган.

Ҳиндистоннинг энг кўп аҳолига эга Уттар-Прадеш штатида 25–27 сентябрь кунлари кучли ёғингарчилик кузатилган. Шу даврда штатда 66,5 миллиметр ёмғир ёққан, ҳолбуки одатий кўрсаткич 7,6 миллиметрни ташкил этади.

Штат расмийларига кўра, табиий офатлар оқибатида 56 киши ҳалок бўлган, 46 киши жароҳатланган. Мингдан ортиқ уй зарар кўрган. Кучли ёмғир Бенгал қўлтиғида шаклланган атмосфера жараёнининг қуруқлик томон силжиши ортидан кучайган.

Ҳиндистоннинг шарқидаги Одиша штатида эса дарёлардаги сув сатҳи кўтарилиши сабаб пасттекисликларда яшовчи 70 мингдан ортиқ аҳоли хавфсиз ҳудудларга эвакуация қилинган. Мамлакат Марказий сув комиссияси етти штатдаги 30 та дарё кузатув станциясида вазиятни оғир деб баҳолаган. Ганга, Гандак, Коси, Багмати ва Нармада каби йирик дарёларда сув сатҳи хавфли чегарадан ошган.

Қўшни Непалда ҳам кучли ёмғир ортидан сув тошқинлари ва кўчкилар юзага келган. Reuters маълумотига кўра, 24 сентябрдан буён табиий офатлар оқибатида 14 киши ҳалок бўлган, яна 11 киши бедарак йўқолган. Расмийлар мамлакатдаги 77 туманнинг 49 тасида эҳтимолий тошқинлар ҳақида огоҳлантириш берган.

Непалнинг айрим тоғли ҳудудларида электр таъминоти ҳам издан чиққан. Раҳуганга дарёсидаги сув тошқини 40 мегаватт қувватга эга гидроэлектр станциясининг айрим иншоотлари ва электр узатиш линияларига зарар етказган.