“Пусан келишуви”: АҚШ ва Хитой савдо сулҳини узайтирди
Қарор Дональд Трамп ва Си Цзиньпиннинг Вашингтондаги учрашуви арафасида эълон қилинди.
АҚШ ва Хитой ўртасидаги савдо сулҳи 2027 йил 10 январгача узайтирилди. Бу ҳақда АҚШ Молия вазири Скотт Бессент Fox News телеканалига берган интервьюсида маълум қилди.
Бессентнинг сўзларига кўра, томонлар 10 ноябрда якунланиши керак бўлган «Пусан келишуви» муддатини яна икки ойга узайтиришга келишиб олган. Унинг таъкидлашича, бу вақт АҚШ ва Хитойга иқтисодий соҳадаги имкониятларни баҳолаш ва кенгроқ келишув устида ишлаш имконини беради.
«Пусан келишуви» 2025 йил октябрь ойида АҚШ президенти Дональд Трамп ва Хитой раиси Си Цзиньпиннинг Жанубий Кореянинг Пусан шаҳридаги учрашуви доирасида эришилган келишувлар асосида шаклланган. У икки давлат ўртасидаги савдо қарама-қаршилигини юмшатиш ва янги тариф чораларини жорий этишни вақтинча тўхтатишга қаратилган.
Келишув дастлаб 2026 йил 10 ноябргача амал қилиши керак эди. Эндиликда унинг амал қилиш муддати 2027 йил 10 январгача узайтирилди.
Мазкур қарор Хитой раиси Си Цзиньпиннинг АҚШга ташрифи ва Дональд Трамп билан музокаралари фонида қабул қилинди. Томонлар савдо билан бир қаторда иқтисодий муносабатлар ва бошқа икки томонлама масалаларни ҳам муҳокама қилмоқда.
