Украина сўнгги ойлардаги ҳаракатлари учун жавоб беради — Песков
Кремль вакили Россия қуролли кучлари Украинадаги турли нишонларга зарба берётганини маълум қилди.
Россия президенти матбуот котиби Дмитрий Песков Украина сўнгги ойлардаги ҳаракатлари учун жавоб бериши кераклигини айтди.
Песков 28 сентябрь куни журналистлар билан мулоқотда Украинадаги вазият ва Киевнинг сўнгги ойлар давомида Россия ҳудудига уюштирган ҳужумлари ҳақидаги саволга жавоб берди.
“Украина сўнгги ойларда содир бўлган ҳаракатлари учун жавоб бериши керак бўлади. Бу ҳозир ҳам содир бўлмоқда. Қуролли кучларимиз махсус ҳарбий операцияни давом эттирмоқда”, — деди Кремль вакили.
Унинг таъкидлашича, Россия қуролли кучлари Украинадаги ўзлари нишон сифатида белгилаган объектларга зарба беришда давом этмоқда.
Reuters хабарига кўра, Россия президенти Владимир Путин аввалроқ сентябрь ойидаги парламент сайловларидан сўнг Киев билан музокараларни қайта бошлашга тайёрлигини билдирган. Шу билан бирга, у Украинани Россия ҳудудига йирик ҳужумлар уюштиришда айблаган.
Путин барча тинчлик таклифлари музокаралар столи устида қолаётганини, бироқ Москва ўз манфаатларидан келиб чиқиб вазиятни баҳолаши кераклигини билдирган.
