9 та вилоятда сел хавфи: Ўзгидромет огоҳлантирди
Ўзбекистоннинг тоғолди ва тоғли ҳудудларида сел-сув тошқини хавфи юзага келиши мумкин.
«Ўзгидромет» прогнозига кўра, 30 сентябрь – 2 октябрь кунлари кутилаётган ёмғирлар сабаб Қашқадарё, Сурхондарё, Самарқанд, Навоий, Жиззах, Тошкент, Наманган, Фарғона ва Андижон вилоятларининг айрим ҳудудларида сел хавфи мавжуд.
Хусусан:
- Қашқадарё вилоятида — Яккабоғ, Деҳқонобод, Чироқчи, Китоб, Шаҳрисабз, Қамаши ва Ғузор туманларида;
- Сурхондарё вилоятида — Сариосиё, Узун, Олтинсой, Денов, Бойсун, Шеробод, Шўрчи, Қумқўрғон ва Музработ туманларида;
- Самарқанд вилоятида — Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой ва Иштихон туманларида;
- Навоий вилоятида — Хатирчи, Навбаҳор, Нурота, Конимех ва Кармана туманларида;
- Жиззах вилоятида — Зомин, Бахмал, Ғаллаорол, Шароф Рашидов, Фориш ва Янгиобод туманларида;
- Тошкент вилоятида — Оҳангарон, Бўстонлиқ, Паркент, Пискент, Ўртачирчиқ ва Юқоричирчиқ туманларида, шунингдек, Ангрен ҳамда Олмалиқ шаҳарларида;
- Наманган вилоятида — Поп, Косонсой, Чортоқ, Чуст, Наманган ва Янгиқўрғон туманларида;
- Фарғона вилоятида — Сўх, Шоҳимардон, Фарғона ва Бешариқ туманларида;
- Андижон вилоятида — Андижон, Асака, Жалақудуқ, Қўрғонтепа, Пахтаобод, Избоскан, Хўжаобод ва Марҳамат туманларида, шунингдек, Хонобод шаҳрида сел-сув тошқини хавфи мавжуд.
Ўзгидрометнинг қайд этишича, айрим ҳудудларда ёғингарчилик сувлари тўпланиши мумкин. Бу эса жойларда сув босиши хавфини юзага келтириши эҳтимолдан холи эмас.
Шу муносабат билан тоғолди ва тоғли ҳудудларда яшовчи фуқаролар, дам олувчилар ҳамда тоғли ҳудудларда ҳаракатланаётган ҳайдовчилардан эҳтиёткорлик чораларини кўриш сўралмоқда.
