Глобал инновация индекси: Ўзбекистон 139 та давлат орасида 77-ўринни эгаллади
Мамлакат ўтган йилги натижасига нисбатан икки поғона юқорилаган.
Ўзбекистон 2026 йилги Глобал инновация индекси (GII) рейтингида 139 та мамлакат орасида 77-ўринни эгаллади. Бу ўтган йилги натижага нисбатан икки поғона юқори кўрсаткичдир.
Глобал инновация индекси Бутунжаҳон интеллектуал мулк ташкилоти (WIPO) томонидан Портуланс институти, корпоратив ва академик тармоқлар ҳамда GII маслаҳат кенгаши билан ҳамкорликда тайёрланади. Рейтинг мамлакатларнинг илмий-тадқиқот ва инновацион ривожланиш даражасини 80 га яқин индикатор асосида баҳолайди.
Ҳисоботга кўра, Ўзбекистон қуйи ва ўрта даромадли 36 та мамлакат орасида 8-ўринни, Марказий ва Жанубий Осиёдаги 11 та давлат орасида эса 4-ўринни эгаллаган.
Ўзбекистон инновацияларга йўналтириладиган сармоя ва ресурсларни ифодаловчи «innovation input» субиндексида 68-ўринни қайд этган. Инновациялар натижадорлигини кўрсатувчи «innovation output» субиндексида эса мамлакат 78-ўринга кўтарилган. Мазкур кўрсаткич бўйича бир йил ичида 14 поғонали ўсиш қайд этилган.
Айрим индикаторларда Ўзбекистон юқори натижаларни кўрсатган. Жумладан, «Илм-фан ва муҳандислик соҳасида битирувчилар» бўйича 2-ўрин, «Тадбиркорлик сиёсати ва маданияти» бўйича 3-ўрин, «Стартап ва скайлапларни молиялаштириш» бўйича 4-ўрин ҳамда «Меҳнат унумдорлиги ўсиши» бўйича 7-ўрин қайд этилган.
Ўзбекистон Глобал инновация индексида илк бор 2015 йилда иштирок этган. Ўша йили мамлакат 141 та давлат орасида 122-ўринни эгаллаган. 2025 йилда эса 139 та мамлакат орасида 79-ўрин қайд этилган.
2026 йилги натижа Ўзбекистоннинг 2030 йилгача GII рейтингида дунёнинг етакчи 60 та инновацион давлати қаторига кириш мақсади доирасида белгиланган кўрсаткичлардан биридир. 2026-йил учун эса 77-ўрин мақсадли кўрсаткич сифатида белгиланган.
