Кесарча кесиш амалиёти: аёлларнинг танлаш ҳуқуқи белгиланди
Амалиётдан олдин ҳомиладор аёлга мумкин бўлган салбий оқибатлар тушунтирилади ва унинг ихтиёрий розилиги олинади.
Адлия вазирлиги туғруқни қабул қилишда кесарча кесиш амалиётини ўтказиш учун тиббий кўрсатмалар рўйхатини давлат рўйхатидан ўтказди.
Унга кўра, давлат ва нодавлат тиббиёт ташкилотларида туғруқни қабул қилишда кесарча кесиш амалиётини ўтказиш учун белгиланган тиббий кўрсатмалар қўлланилади.
Ҳужжатда кесарча кесиш амалиёти учун жами 31 та тиббий кўрсатма белгиланган. Амалиёт шошилинч, кечиктириб бўлмайдиган, режалаштирилган ва режали гуруҳларга таснифланади.
Шунингдек, тиббий кўрсатмалар мавжуд бўлмаган тақдирда ҳам ҳомиладор аёл кесарча кесиш амалиётини ўтказишни танлаш ҳуқуқига эга.
Кесарча кесиш амалиётидан олдин ҳомиладор аёлга унинг мумкин бўлган салбий оқибатлари ҳақида маълумот берилади. Амалиёт эса унинг ихтиёрий розилиги асосида амалга оширилади.
