Россия нақд рубль олиб чиқишга чеклов қўйди: Ўзбекистон ҳам рўйхатда
Жисмоний шахслар учун лимит 1 млн рубль этиб белгиланди, қоидани бузганларда белгиланган лимитдан ортиқ сумма олиб қўйилади.
Россия президенти Владимир Путин мамлакатдан нақд Россия рублини олиб чиқиш тартибини кучайтирувчи фармонни имзолади. Янги тартиб 2026 йил 29 сентябрдан кучга кирди.
Ҳужжатга кўра, жисмоний шахслар томонидан Россиядан Ўзбекистон, Озарбайжон, Тожикистон ва Евроосиё иқтисодий иттифоқи давлатларига 1 млн рублдан ортиқ нақд пул олиб чиқиш тақиқланади.
Қоидалар бузилган тақдирда, жисмоний шахсдан 1 млн рублдан ортиқ бўлган сумма олиб қўйилиши мумкин. Юридик шахслар ва якка тартибдаги тадбиркорлар учун эса мазкур давлатларга нақд рубль олиб чиқиш суммадан қатъи назар тақиқланган.
Шу билан бирга, фармонда айрим истиснолар ҳам назарда тутилган. Жумладан, жисмоний шахслар ҳукумат томонидан белгиланадиган халқаро аэропортлар орқали 1 млн рублдан ортиқ маблағни олиб чиқиши мумкин. Бунинг учун нақд пулнинг фуқаронинг банк ҳисобварағи ёки омонатидан ечиб олинганини тасдиқловчи банк кўчирмаси ёки бошқа белгиланган ҳужжатлар тақдим этилиши керак.
Бундан ташқари, халқаро транзит ташувлари, Россиянинг хориждаги дипломатик ва консуллик муассасалари фаолиятини таъминлаш ҳамда айрим давлат эҳтиёжлари билан боғлиқ ҳолатлар учун ҳам алоҳида истиснолар белгиланган.
Мазкур чеклов Россияда 2026 йил 1 апрелдан амал қилиб келаётган нақд рублни ЕОИИ давлатларига олиб чиқиш тартибининг янгиланган шакли ҳисобланади. Аввал жисмоний шахслар учун лимит 100 минг АҚШ доллари эквивалентида белгиланган эди. Янги фармон билан лимит 1 млн рубль этиб ўзгартирилди ва чеклов Ўзбекистон, Озарбайжон ҳамда Тожикистонга ҳам татбиқ этилди.
