АҚШ-Эрон музокаралари боши берк кўчага кирди — Axios
Қатар воситачилари икки томон ўртасида келишувга эришишга уринмоқда, бироқ ҳозирча натижа йўқ.
Қатар воситачилигида АҚШ ва Эрон ўртасида олиб борилган дипломатик музокараларда ҳозирча сезиларли ютуққа эришилмади. Бу ҳақда Axios музокаралардан хабардор учта манбага таяниб хабар берди.
Маълум қилинишича, Қатар воситачилари икки томон ўртасида муросага эришиш учун янги таклиф билан чиққан. Унга кўра, Эроннинг ядровий дастурига нисбатан муайян чекловлар эвазига АҚШнинг Эрон соҳилларидаги денгиз блокадасини бекор қилиш масаласи кўриб чиқилган.
Қатарлик воситачи Али ал-Тавадий душанба куни Нью-Йоркда Эрон ташқи ишлар вазири Аббос Ароқчий ва унинг жамоаси билан учрашган. Кейинроқ у АҚШ вакиллари, жумладан, президентнинг махсус вакили Жаред Кушнер билан музокара ўтказган. АҚШ вице-президенти Венс ҳам учрашувнинг бир қисмида қатнашган.
Дастлаб АҚШ расмийлари музокараларни “ижобий ва конструктив” деб баҳолаган ва Эрон ядровий масалада муайян мослашувчанлик кўрсатишга тайёрлигини билдирган эди. Шунингдек, Трамп маъмурияти ядровий дастурини чеклаш эвазига Теҳронга санкцияларни юмшатиш ҳамда музлатилган маблағларни очиш имкониятини кўриб чиқаётгани ҳақида хабарлар тарқалган. Бироқ Дональд Трамп бундай таклиф берилганини рад этган.
Axios манбаларига кўра, музокаралар давомида томонлар асосий масалаларда ўз позицияларини ўзгартирмаган. Бир манба жараённи “боши берк кўча” деб баҳолаб, Эрон АҚШ қабул қила олмайдиган талабларни илгари сураётганини айтган.
Хусусан, Теҳрон АҚШнинг денгиз блокадасини бекор қилишни талаб қилмоқда. Вашингтон эса Эроннинг ядровий дастури бўйича аниқ чекловлар жорий этилишини истамоқда. Дональд Трамп аввалроқ Эрон томонидан илгари сурилган Ҳурмуз бўғозини очиш режасини ҳам рад этган эди.
Reuters хабарига кўра, Қатар шу билан бирга дипломатик воситачиликни давом эттириш ниятида. Доҳа томонлар ўртасидаги алоқа сақланиб қолаётганини ва музокараларни келишув сари олиб бориш мумкинлигига умид қилаётганини билдирган.
