Чипта йўқ, қаршилик бор: Тошкентлик йўловчи 3 суткага қамалди
Фуқаро автобусдан тушганидан сўнг йўл ҳақи тўланганини тасдиқловчи ҳужжатни сўраган назоратчи билан жанжаллашиб, унга куч ишлатишга уринган.
Тошкент шаҳрининг Чилонзор туманида автобусда йўл ҳақини тўламаган ва чипта назоратчисига қаршилик кўрсатган йўловчига нисбатан маъмурий қамоқ жазоси тайинланди.
Маълум қилинишича, «Тошкент шаҳар йўловчи ташишни мониторинг ва назорат қилиш» давлат муассасаси томонидан автобусларда йўл ҳақи тўланишини назорат қилишга қаратилган рейд тадбирлари олиб борилмоқда.
Навбатдаги назорат тадбири Чилонзор тумани ҳудудида ўтказилган. Шунда M.M. исмли фуқаро автобусдан тушганидан сўнг ундан йўл ҳақи тўланганини тасдиқловчи ҳужжатни кўрсатиш сўралган.
Бироқ йўловчи турли важларни келтириб, назоратчининг талабини бажармаган ва жамоат жойида тартибсизлик келтириб чиқарган.
Фуқаронинг шахсига аниқлик киритиш жараёнида у жанжал кўтарган ва назоратчига куч ишлатишга уринган. Мазкур ҳолат назоратчининг боди-камерасига ёзиб олинган.
Ҳолат юзасидан Жиноят ишлари бўйича Чилонзор туман судида очиқ суд мажлиси бўлиб ўтган.
Суд қарорига кўра, M.M. га нисбатан 3 сутка маъмурий қамоқ жазоси тайинланган.
Масъул ташкилотнинг қайд этишича, йўловчилар автобусга чиққанидан сўнг йўл ҳақини тўлаши ва тўловни тасдиқловчи ҳужжатга эга бўлиши керак. Шаҳар ичида ва шаҳар атрофига қатнайдиган автобусларда чиптасиз юриш Маъмурий жавобгарлик тўғрисидаги кодекснинг 144-моддаси 5-қисмига мувофиқ жаримага сабаб бўлади.
Шунингдек, «Тошкент шаҳар йўловчи ташишни мониторинг ва назорат қилиш» давлат муассасаси назоратчиларига хизмат вазифасини бажариш вақтида қаршилик кўрсатиш, уларга нисбатан зўравонлик ишлатиш ёки таҳдид қилиш қонунчиликда белгиланган жавобгарликка сабаб бўлиши мумкин.
