“Ўқитувчи — меҳр дарёси”: Президент устозларни касб байрами билан табриклади

Шавкат Мирзиёев Ўқитувчи ва мураббийлар куни арафасида “Янги Ўзбекистон” университетида устоз ва мураббийлар билан учрашув ўтказмоқда.

Давлат раҳбари мазкур даргоҳ таълим тизимига янгича руҳ ва мазмун олиб киришини таъкидлаб, барча педагогларни касб байрами билан табриклади.

— Ўқитувчи — меҳр дарёси, ўқитувчи — эзгулик булоғи, ўқитувчи — маърифат қуёши! Устозлар бугун ёшлар қалбига қадаётган маърифат ва эзгулик уруғининг ҳосилидан эртага бутун жамият баҳраманд бўлади, — деди Президент.

Шавкат Мирзиёев буюк аждодларимиз камолоти ортида ҳам уларга сабоқ берган муаллимлар турганини қайд этди. Имом Бухорий, Беруний, Амир Темур ва Алишер Навоий каби буюк сиймоларни етиштирган устозларни “одамийлик боғининг боғбонлари” деб атади.

Давлат раҳбари умрини ёшлар камолотига бағишлаган барча устоз ва мураббийларга юксак ҳурмат ва миннатдорлик билдирди.

Учрашувда бугун дунёда билим яратиш, ахборот тарқатиш ва меҳнат қилиш усуллари жадал ўзгараётгани қайд этилди. Сунъий интеллект матн тайёрлаши, дастур ёзиши ва маълумотларни таҳлил қилиши мумкин.

Бироқ, Президент таъкидлаганидек, ҳеч бир технология боланинг қалбига устоздек йўл топиб, унга Ватанга муҳаббат ва масъулият туйғусини сингдира олмайди.

Шунингдек, давлат раҳбари таълим ва илм-фан фидойиларининг бир гуруҳини давлат мукофотлари билан тақдирлаш тўғрисидаги фармонни имзолаганини маълум қилди.

Мукофотланганлар орасида педагоглар билан бир қаторда таълим ривожига ҳисса қўшаётган тадбиркорлар ва хорижлик ҳамкорлар ҳам бор. Учрашув давомида давлат мукофотлари ўз эгаларига топширилди.

Президент мукофот соҳибларини табриклаб:

— Ишонинг, мен уларни кўксингизга тақиб, сизлардан ҳам кўпроқ хурсанд бўляпман, — деди.

Шунингдек, таълимнинг барча бўғинларидаги илғор педагогларни рағбатлантириш мақсадида жадид бобомиз Абдулла Авлоний номидаги алоҳида давлат мукофотини таъсис этиш таклиф қилинди.

Унинг илк соҳибларини келаси йилги Ўқитувчи ва мураббийлар куни арафасида эълон қилиш ва тақдирлаш кўзда тутилмоқда.