“Можарони музлатиш керак”: Тоқаев Украинадаги вазият бўйича таклиф билдирди

Қозоғистон президенти Қосим-Жомарт Тоқаев Украинадаги ҳарбий ҳаракатларни музлатиб, кейинчалик дипломатик музокараларга ўтиш зарурлигини билдирди.

Тоқаев бу ҳақда 29 сентябрь куни Берлинда Германия канцлери Фридрих Мерз билан ўтказилган қўшма матбуот анжуманида гапирди.

Унинг таъкидлашича, Қозоғистон бошиданоқ Украина халқи, унинг тарихи, маданияти, анъаналари ва тилига ҳурмат билан қараган.

“Мен урушни дарҳол тўхтатишимиз керак, демадим. Ҳозирги шароитда бу, эҳтимол, реал бўлмаслиги мумкинлигини тушунаман. Мен Украина ҳудудидаги ҳарбий ҳаракатларни музлатиш ҳақида гапиряпман — шундан сўнг дипломатик ёки бошқа музокараларга ўтиш мумкин”, — деган Тоқаев.

Қозоғистон президенти, шунингдек, Владимир Путинни “ажойиб давлат арбоби” деб атади ва Россия раҳбарига Украинадаги можарони тугатиш бўйича унинг позициясини тушунганидан миннатдор эканини билдирган.

Тоқаев Украинадаги можаро бўйича бундай позицияни аввал ҳам илгари сурган. 25 июль куни Омск шаҳрида Путин билан учрашуви чоғида у жанговар ҳаракатларни музлатиш ва Истанбулдаги музокаралар формуласига қайтиш мумкинлигини айтган эди.

Ўша пайтда Кремль матбуот котиби Дмитрий Песков Киевнинг позициясини ҳисобга олган ҳолда можарони музлатишнинг “ўзи имконсиз” эканини билдирган. Август ойида президент ёрдамчиси Юрий Ушаков ҳам Россия позицияси можарони музлатишни истисно қилишини айтган.

Тоқаевнинг 29 сентябрдаги баёноти Германия билан музокаралар фонида янграган. Қозоғистон президенти мамлакатнинг Украина масаласидаги ёндашувида давлатларнинг ҳудудий яхлитлиги тамойилига амал қилишини ҳам таъкидлаган.