Қуёш фаоллиги кучаймоқда: Ерда магнит бўрони кузатилиши мумкин
Британия геология хизмати 2 октябрь куни G1 даражасидаги кучсиз магнит бўрони кузатилиши мумкинлигини маълум қилди.
Октябрь ойи бошида Қуёшда юз берган плазма отилиши сабабли Ерда геомагнит фаоллик кучайиши кутилмоқда. Британия геология хизмати 2 октябрь куни G1 даражасидаги кучсиз магнит бўрони кузатилиши мумкинлигини прогноз қилган.
Маълумотларга кўра, 28 сентябрь куни Қуёшда содир бўлган тож массасининг отилиши натижасида ҳосил бўлган плазма булути 1–2 октябрь кунлари Ерга етиб келиши кутилмоқда.
1 октябрда геомагнит фаоллик ошиши, бироқ магнит бўрони кузатилмаслиги прогноз қилинмоқда. 2 октябрда эса фаоллик энг юқори даражага етиб, айрим вақт оралиғида G1 даражасидаги магнит бўрони юз бериши мумкин.
3 октябрга келиб Қуёшдаги отилиш оқибатлари аста-секин сусайиши кутилмоқда. Шунга қарамай, геомагнит фаоллик бир муддат юқори бўлиб қолиши мумкин.
Шунингдек, 30 сентябрь куни Қуёшда C9 синфидаги чақнаш қайд этилган. Дастлабки таҳлилларга кўра, у билан боғлиқ плазма булути Ер орбитасига сезиларли таъсир кўрсатмасдан ўтиб кетиши мумкин.
