Икки маҳбус сабаб можаро: Жанубий Корея Украинадан узр талаб қилди

Жанубий Корея президенти Ли Чже Мён Украина икки Шимолий кореялик ҳарбий асирнинг Жанубий Кореяга топширилгани ҳақидаги маълумотни ошкор қилгани юзасидан Киевдан узр талаб қилди. У Украина фактларни тан олиш ва оммавий узр сўрашдан бош тортса, қўшимча чоралар кўрилишини билдирди.

Ли Чже Мённинг айтишича, Украина томони Шимолий Кореялик ҳарбий асирларни Жанубий Кореяга топшириш жараёнини махфий сақлашни сўраган ва томонлар бунга келишган. Бироқ кейинчалик Украина мазкур маълумотни оммага ошкор қилган.

Жанубий Корея президенти Украина томонининг келишув мавжудлигини инкор этганидан ҳам норози эканини билдирди. Унинг таъкидлашича, Сеул Киевдан келишувни тан олиш ва бу ҳолат юзасидан оммавий равишда узр сўрашни талаб қилган.

Ли Чже Мён, шунингдек, Украина томонидан Корея яриморолида яқинлашиб келаётган тўқнашув ҳақидаги баёнотлардан ҳам норозилигини билдирган. У бундай баёнотлар минтақадаги вазиятга салбий таъсир кўрсатиши мумкинлигини таъкидлаган.

Можаро Украина президенти Владимир Зеленскийнинг сентябрь ойида БМТ Бош Ассамблеясидаги нутқи вақтида икки Шимолий кореялик аскар Жанубий Кореяга топширилгани ҳақида маълум қилганидан кейин кучайди. Мазкур ҳарбийлар Украина томонидан Россиянинг Курск вилоятидаги жанглар вақтида асирга олинган эди.

Ўз навбатида, Украина томони Сеул ва Киев ўртасида ҳарбий асирларни топшириш бўйича махфийлик келишуви мавжуд бўлганини инкор қилган. Украина ташқи ишлар вазири Андрий Сибига эса вазиятни дипломатик тушунмовчилик деб атаб, Жанубий Корея билан муносабатларни тез орада яхшилашга умид билдирган.

Жанубий Корея эса Украинадан расмий тушунтириш ва узр талаб қилмоқда. Президент Ли Чже Мённинг сўнгги баёнотига кўра, агар Киев бу талабларни бажармаса, Сеул кейинги чораларни кўриб чиқади. Қандай чоралар кўрилиши ҳозирча очиқланмаган.