Қалбаки пуллар ва “босмахона”: Наманганда 51,5 млн сўмлик қалбаки пуллар аниқланди
Пуллар тайёрлаб сотганликда гумонланган икки шахс ушланган.
Наманган шаҳрида қалбаки банкнотларни тайёрлаб, сотиш билан боғлиқ ҳолат фош этилди. Бу ҳақда Давлат хавфсизлик хизматининг Жиззах ва Наманган вилоятлари бўйича бошқармалари ҳамда Божхона органлари ҳамкорлигида ўтказилган тезкор тадбирда маълум бўлди.
Тадбир давомида Поп туманида яшовчи, 1989 йилда туғилган ва Избоскан туманида истиқомат қилувчи, 1999 йилда туғилган икки нафар шахс қалбаки 20 минг, 50 минг, 100 минг ва 200 минг сўмлик банкнотларни тайёрлаб, сотгани аниқланган.
Улар жами 37,4 млн сўмлик қалбаки пулларни 7,5 млн сўмга шартли харидорга сотаётган вақтида ашёвий далиллар билан ушланган.
Шунингдек, шахсий тинтув ҳамда улардан бирининг бошқарувида бўлган «Lacetti» русумли автомобиль салонини кўздан кечириш давомида яна 6,4 млн сўмлик қалбаки пуллар аниқланган.
Тезкор тадбир давом эттирилиб, Избоскан туманида яшовчи фуқаронинг хонадони кўздан кечирилган. У ердан яна 7,7 млн сўмлик қалбаки пуллар, турли номиналдаги купюралар тасвири туширилган 145 дона оқ қоғоз, шунингдек, компьютер, рангли принтер ва бошқа ашёлар процессуал тартибда расмийлаштириб олинган.
Шу тариқа, тезкор тадбирлар давомида жами 51,5 млн сўмлик қалбаки пуллар аниқланган.
Ҳолат юзасидан мазкур шахсларга нисбатан жиноят иши қўзғатилган. Ҳозирда тергов ҳаракатлари олиб борилиб, уларнинг эҳтимолий бошқа жиноий алоқаларини аниқлаш бўйича чоралар кўрилмоқда.
