Ҳиндистон-Покистон чегарасида отишма: икки покистонлик ҳалок бўлди
Ҳиндистон ОАВлари уларни чегарани бузишга уринган шахслар сифатида таърифлаган.
Ҳиндистоннинг Чегара хавфсизлиги кучлари (БСФ) томонидан Покистоннинг Касур чегара ҳудудида ўт очилиши оқибатида икки фуқаро ҳалок бўлди, яна бир киши яраланди. Бу ҳақда Dawn хавфсизлик манбаларига таяниб хабар берди.
Нашр маълумотларига кўра, ҳодиса Ладҳар қишлоғи аҳолиси бўлган уч нафар фуқаро чегара устунидан бир неча қадам нарига ўтганидан сўнг юз берган. Покистон хавфсизлик манбалари Ҳиндистоннинг Чегара хавфсизлиги кучлари ходимлари уларга огоҳлантиришсиз ўт очганини билдирган.
Манбаларнинг таъкидлашича, учала фуқаро ҳам қуролсиз бўлган ва чегара тўсиғидан ўтишга уринмаган.
Покистон томони ушбу ҳодисани Ҳиндистон ва Покистон ўртасидаги чегара келишуви ҳамда халқаро чегарадаги ҳаракатларни тартибга солувчи стандарт тартиб-таомилларнинг бузилиши сифатида баҳолаган.
Шу билан бирга, ҳодисанинг тафсилотлари бўйича томонларнинг позицияси бир хил эмас. Ҳиндистон ОАВлари ҳалок бўлганларни чегарани ноқонуний кесиб ўтишга уринган шахслар сифатида таърифлаган. Покистон томони эса бу маълумотни рад этиб, фуқаролар чегарани кесиб ўтишга уринмаганини билдирмоқда.
