Кредит олишдан олдин огоҳлантириш: банклар учун янги талаблар белгиланди

 

Ўзбекистонда банклар мижозларни кредит олиш билан боғлиқ хавфлар ва қарзни ўз вақтида тўламаслик оқибатлари ҳақида олдиндан огоҳлантириши шарт бўлади. Бу ҳақда Марказий банк матбуот хизмати хабар берди.

 

Марказий банк бошқарувининг тегишли қарори 2026 йил 30 сентябрь куни Адлия вазирлигида 3948-сон билан давлат рўйхатидан ўтказилган. Ҳужжат расмий эълон қилинган кундан эътиборан бир ой ўтгач кучга киради.

 

Янги тартибга кўра, банкларнинг кредит маҳсулотлари рекламаларида қарзни ўз вақтида тўламаслик хавфли экани ҳақида огоҳлантириш бўлиши керак.

 

Бунда огоҳлантириш:

• расм, видео ёки аудио кўринишидаги рекламанинг камида 10 фоизини эгаллаши;

• кредит шартномасининг биринчи саҳифасида камида 30 фоиз майдонни эгаллаши;

• қарзни ўз вақтида тўламаслик натижасида юзага келиши мумкин бўлган оқибатларни кўрсатиши керак.

 

Жумладан, огоҳлантиришда қарздорликнинг ошиб бориши, қарз олувчининг мол-мулки ва банк ҳисобварақларидаги маблағларига ундирув қаратилиши ҳамда кредит тарихига салбий таъсир кўрсатиши мумкинлиги ҳақида маълумот берилади.

 

Шунингдек, мижозларни чалғитувчи кредит маҳсулотларини реклама қилган банкларга нисбатан тегишли чора ва санкциялар қўлланади.

 

Марказий банкнинг қайд этишича, мазкур ўзгартиришлар фуқароларнинг кредит олишдан олдин унинг шартлари, хатарлари ва қарзни ўз вақтида тўламаслик оқибатлари ҳақида аниқ ва тушунарли маълумотга эга бўлишини таъминлашга қаратилган.

 

Бу орқали фуқароларнинг ўз молиявий имкониятларини баҳолаб, ўйлаб қарор қабул қилишига, ортиқча қарз юкининг олдини олиш ва банкларнинг кредит маҳсулотлари ҳамда рекламасида очиқликни таъминлаш кўзда тутилган.