Маҳкумларни ватанига ўтказиш: Ўзбекистон ва Покистон ўртасидаги битим ратификация қилинади
Битимга кўра, озодликдан маҳрум қилиш жазосини ўтаётган маҳкумлар жазонинг қолган қисмини фуқароси бўлган давлатда ўташи учун ўтказилиши мумкин.
Сенатнинг йигирманчи ялпи мажлисида 2026 йил 5 февраль куни Исломобод шаҳрида имзоланган “Ўзбекистон Республикаси ва Покистон Ислом Республикаси ўртасида маҳкумларни ўтказиш тўғрисидаги шартномани ратификация қилиш тўғрисида”ги қонун муҳокама қилинди.
Шартномага кўра, томонлар озодликдан маҳрум қилиш жазосини ўтаётган маҳкумларни жазонинг қолган қисмини улар фуқароси бўлган давлатда ўташи учун ўтказиш бўйича ҳамкорлик қилади.
Ҳужжатда маҳкумни ўтказиш шартлари ва бундай сўровни рад этиш асослари, ваколатли марказий органлар, сўров шакли ва мазмуни, ҳукмни ижро этиш тартиби, транзит ҳамда харажатларни қоплаш масалалари белгиланган.
Сенаторлар ушбу қонуннинг қабул қилиниши чет элда жазо ўтаётган Ўзбекистон фуқароларининг ҳуқуқ ва қонуний манфаатларини ҳимоя қилиш имкониятларини кенгайтиришини таъкидлади.
Шунингдек, мазкур тартиб маҳкумларнинг ижтимоий реабилитациясига кўмаклашиши, икки давлат ўртасидаги ҳуқуқий ҳамкорликни ривожлантириши ва жазони ижро этиш соҳасидаги халқаро ҳамкорликни мустаҳкамлаши қайд этилди.
Муҳокамалар якунида қонун сенаторлар томонидан маъқулланди.
