Кашпировскийнинг сўнгги сеанси: машҳур «телетабиб» 87 ёшида оламдан ўтди

Собиқ иттифоқ даврида  телевизион «даволаш сеанслари» билан машҳур бўлган Анатолий Кашпировский 87 ёшида вафот этди. У 3 октябрь куни Москва шаҳрида ҳаётдан кўз юмган.

 

Кашпировскийнинг вафот этгани ҳақида россиялик телебошловчи Андрей Малахов маълум қилган. Кейинчалик бу хабар унинг яқин вакили Сергей Рудих томонидан ҳам тасдиқланган. Унинг сўзларига кўра, Кашпировскийнинг қон босими кескин тушиб кетган ва тез ёрдам чақирилган. У шифохонага олиб кетилган, бироқ юраги тўхтаган. Юрак фаолиятининг тўхташига нима сабаб бўлгани ҳозирча аниқланмоқда.

 

Анатолий Кашпировский 1939 йил 11 августда Украинанинг Став­нитса қишлоғида туғилган. У Виннитса тиббиёт институтини тамомлаган ва қарийб 25 йил давомида психиатрия шифохонасида ишлаган.

 

Унга катта шуҳрат 1980 йилларнинг охирида келган. 1989 йилда Марказий телевидениеда Кашпировскийнинг «соғломлаштириш сеанслари» намойиш этила бошлаган. Дастурлар давомида у томошабинларга гипноз ва турли психотерапевтик усуллар орқали таъсир кўрсатган. Унинг кўрсатувлари бутун собиқ иттифоқ бўйлаб миллионлаб одамларни телевизор қаршисига жамлаган.

 

Кашпировский телевизион фаолияти давомида масофадан туриб турли касалликларни даволаш мумкинлигини таъкидлаган. У сувни «зарядлаш», томошабинларга турли «установка»лар бериш ва гипноз сеанслари ўтказиши билан танилган. Кейинчалик унинг усуллари илмий ва тиббий доираларда кескин танқид қилинган. Россия Фанлар академияси 2024 йилда Кашпировскийнинг усулларини сохта илмга оид деб баҳолаган.

 

Кашпировский кейинчалик сиёсат билан ҳам шуғулланган. 1993 йилда у Россия Давлат думаси депутати этиб сайланган. 1995 йилда Будённовскдаги гаровга олинганлар билан боғлиқ вазиятда террорчилар билан музокараларда қатнашган.

 

У сўнгги йилларда ҳам ўз фаолиятини тўлиқ тўхтатмаган. 2020 йилдан бошлаб YouTube орқали онлайн «соғломлаштириш сеанслари» ўтказган.