Қашқадарёда фуқаро МИБ орқали ишга тикланди
Маълум бўлишича, фуқаро 2021 йилдан бери ишлаб келаётган ишхонасидан ғайриқонуний бўшатилган.
Қамаши туманида ҳам фуқаронинг меҳнат ҳуқуқи тикланиб, суд ҳужжати ижроси таъминланди.
Фуқаро А.Д. Қамаши туманидаги техникумда 2021 йилдан турли лавозимларда меҳнат қилиб келган. Бироқ 2026 йил 16 апрелдаги буйруқ билан у билан тузилган меҳнат шартномаси бекор қилинган.
Фуқаро мазкур қарорга норозилик билдириб, судга мурожаат қилган.Фуқаролик ишлари бўйича Яккабоғ туманлараро судининг 2026 йил 20 августдаги ҳал қилув қарори билан даъво талаблари қисман қаноатлантирилди.
Суд техникумнинг буйруғини ғайриқонуний деб топиб, уни бекор қилиш ҳамда фуқарони техникумнинг “Таълим сифати назорати бўлими бош мутахассиси” лавозимига тиклаш ҳақида қарор қабул қилди.
Суд ҳужжати ижросини таъминлаш мақсадида Мажбурий ижро бюроси Қамаши тумани бўлими томонидан ижро ҳаракатлари амалга оширилиб, фуқаронинг меҳнат ҳуқуқи тикланди.
