Энди қуруқлик орқали ҳам бориш мумкин: Тожикистон ва Эрон ўртасида тўлиқ визасиз режим кучга кирди
Визасиз қатнов фақат ҳаво йўлларига эмас, қуруқликдаги халқаро чегара ўтиш пунктларига ҳам татбиқ этилади.
2026 йил 5 октябрдан Тожикистон ва Эрон ўртасида умумий фуқаролик паспорти эгалари учун визасиз режим тўлиқ кучга кирди.
Тожикистон Ташқи ишлар вазирлиги маълумотларига кўра, амалдаги умумий фуқаролик паспортига эга бўлган икки мамлакат фуқаролари 90 кунлик муддат ичида 30 кунгача бошқа давлат ҳудудига визасиз кириши, транзит ўтиши ёки вақтинча қолиши мумкин.
Янги тартиб халқаро чегара ўтиш пунктларига, жумладан, қуруқликдаги чегара пунктлари ва халқаро аэропортларга нисбатан қўлланилади. Шунингдек, учинчи мамлакатлардан ҳаво йўллари орқали келиб чегарани кесиб ўтишда ҳам ушбу тартибдан фойдаланиш мумкин.
Бунда фуқаролар икки давлатнинг чегарани кесиб ўтиш ва мамлакат ҳудудида бўлиш бўйича миллий қонунчилиги талабларига риоя қилиши лозим.
Тожикистон ва Эрон ўртасидаги визасиз режим дастлаб 2024 йил 10 августда жорий этилган. Ўша пайтда тартиб фақат Душанбе–Теҳрон ва Теҳрон–Душанбе йўналишларидаги ҳаво қатновларига татбиқ этилган.
Эндиликда эса визасиз режим қуруқликдаги халқаро чегара ўтиш пунктларини ҳам қамраб олади. Бу икки мамлакат фуқароларининг ўзаро сафарларини янада енгиллаштиради.
